TI CHUNG i mipa hi zoh hmanh u. Harnak nganpi chung ah a phan ko lo mei? Khi nga nih khin a hun dolh cang lai! Hi mipa cu ahodah a si nan hngal maw? Amah min cu Jonah a si. Zeitindah cutluk harnak nganpi chung ah cun a phanh kan zoh tuah lai.

Jonah cu Jehovah a profet pakhat a si. Profet Elisha a thih hnu tlawm pal ah Jehovah nih Jonah cu: ‘Nineveh khuapi ah cun va kal tuah. Khika i mi hna an ṭhatlonak cu a ngan tuk hringhran i, hi kong hi chim seh ti kan duh,’ a ti.

Sihmanhsehlaw Jonah cu kal a duh lo. Cucaah Nineveh he aa ralchan mi lam lei ah a kal mi lawng kha aa cit. Cutin a zam caah Jehovah cu Jonah cung ah aa lawm lo. Cucaah thlichia fakpi a hranter. Thlichia a fah tuk caah lawng cu ti chung ah a pil hnik. Lawng cawngtu pawl cu an thin a phang tuk i, an pathian hna sin ah bawmhnak an hal cio.

A donghnak ah Jonah nih: ‘Keimah cu van le vawlei a sertu Pathian Jehovah a bia mi ka si. Cun Jehovah nih a ka fial mi rian kha tuah lo in ka zam tak,’ tiah a chimh hna. Cucaah lawng cawngtu hna nih: ‘Thlichia a daih nak hnga zeitindah kan in tuah lai?’ tiah an hal.

‘Ti chung ah ka hlonh u law rili cu a dai ṭhan ko lai,’ tiah Jonah nih a ti hna. Lawng cawngtu hna nih hlonh cu an duh lo, sihmanhsehlaw thlichia cu a zual chin caah a donghnak ah Jonah cu an hlonh taktak. Cu cangka in thlichia cu a dai i, rili cu dai tein a um ṭhan.

Jonah cu ti chung i a vung pil tik ah, ngapi pakhat nih amah cu a dolh. Sihmanhsehlaw a thi lo. Ni thum le zan thum chung ngapi paw chung ahcun a um. Jehovah a nawl ngaih in Nineveh khua i a kal lo kha Jonah cu aa ngaichih ngaingai. Cucaah amah nih zeidah a tuah nan hngal maw?

Amah kha bawmh awk ah Jehovah sin ah thla a cam. Cu hnu ah Jehovah nih ngapi cu Jonah kha leiro cung ah a luakter ṭhan. Cu hnu ah Jonah cu Nineveh khua ahcun a kal. Jehovah a kan fial mi paoh cu tuah awk ah zeitluk biapi dah a si ti fimnak a kan cawnpiak lo maw?