Kukwe kira 70

Jonás bätä gwa kri

NI TUIN mrente ye mike ñärärä. Tä ja tarenike, ¿ñan ererea? ¡Gwabike ñainkä! ¿Ni ye nire gare mäi? Kä Jonás. Ñokänti ja mikani kukwe kri te kwe, ani mike gare jai.

Jonás ye profeta Jehovakwe. Profeta Eliseo krütani bitikäre, Jehová niebare Jonás ie: ‘Nän juta kri Nínive känti. Nitre kä yekänti tä kukwe käme krubäte nuainne, aune ti tö mä juain blite kukwe yebätä bentre.’

Akwa Jonás ñan tö namani näin. Yebätä ru nänkä kä madakänti te nikani, Nínive ye bäre mento. Jonás ngitiani ye ñan namani kwin Jehovakrä. Yebätä mürie dite mikani mate kwe. Namani dite krubäte yebätä bäsi ru nikani ñöte. Nitre ru ngwanka nikaninkä krubäte, aune namani ja di kärere ngöbö kwetre ie.

Mrä Jonás niebare ie: ‘Jehová Ngöbö kä kwinta bätä kä tibienta sribekä ye mikata täte tikwe. Jehová sribi biani nuaindre tie yebätä tita ngitie.’ Yebätä nitre ru ngwanka käkwe ngwanintari: ‘¿Nunkwe mä nuaindre ne kwe mürie ne riadrekä?’

‘Ti kite mrente, aune mren rabai kwekebe,’ Jonás niebare. Nitre ru ngwanka ñan tö namani nuain, akwa mürie namani mate bäri dite angwane, Jonás kitani mrente kwetre. Bengwaire mürie nötani, aune mren namaninta kwekebe.

Jonás nikani ñöte nguse ye ngwane, gwa kri käkwe ñaninkä. Akwa niara ñan krütani. Köbömä te rare aune dibire nuabare kwe gwa teri. Jonás ñaka Jehová kukwei mikani täte aune ñan nikani Nínive, yebätä ja namani ruin ngite krubäte ie. Yebätä, ¿dre nuainbare kwe gare mäi?

Jonás orabare Jehovai aune ja di käräbare kwe ie. Yebätä Jehová gwa ye mikani Jonás yaire kä nötare känti. Biti Jonás nikani Nínive. Kukwe ne tä mike gare nie, Jehová kätä kukwe niere ye jökrä nikwe mikadre täte ye ütiäte krubäte, ¿ñan ererea?

Tärä Bibliabätä Jonás.