DAVARA lalonai ia noho tauna mani oi itaia. Ia kerere inai, ani? Unai gwarume ese do ia hadonoa! Unai tau ena ladana oi diba, a? Iena ladana be Iona. Inai kerere ia davaria ena badina mani ita itaia.

Iona be Iehova ena peroveta tauna ta. Elisaia ia mase bena nega sisina murinai, Iehova ese Iona ia hamaoroa: ‘Hanua badana ladana Nineva dekenai oi lao. Unuseniai idia noho taudia edia kara dika be bada herea, bona lau ura idia dekenai oi herevalaia.’

To Iona ia ura lasi ia lao. Unai dainai bouti ta dekenai ia guia bona ma gabu ta dekenai ia lao. Unai kara dainai Iehova ia moale lasi. Unai dainai lai guba badana ta Ia havaraia. Lai be bada dainai, bouti be kahirakahira do ia mutu. Bouti lalonai idia noho taudia idia gari bada, bona edia dirava dekenai idia boiboi heduru totona.

Dokonai Iona be idia ia hamaoroa: ‘Lau ese guba bona tanobada ia havaraia Diravana, Iehova, lau tomadiho henia. Bona Iehova ese ia henia gaukarana amo lau heau.’ Unai dainai bouti lalonai idia noho taudia idia henanadai: ‘Dahaka do ai karaia inai lai gubana hadokoa totona?’

Iona ia gwau: ‘Umui ese lau be davara dekenai umui negea diho, bena davara do ia namo lou.’ Bouti lalonai idia noho taudia idia ura lasi unai bamona idia karaia, to lai gubana ia bada ia lao dainai ia idia negea diho. Maoromaoro lai gubana ia ore bona davara ia namo lou.

Iona be davara lalonai ia diho noho lalonai, inai gwarume badana ese ia hadonoa. To ia mase lasi. Dina toi bona hanuaboi toi gwarume ena bogana lalonai ia noho. Iona ia sori bada herea badina Iehova ena hereva ia kamonai lasi. Unai dainai, ia karaia karana oi diba, a?

Iona be Iehova ena heduru totona ia noinoi. Bena Iehova ena siahu dainai, gwarume badana ia mumuta bona Iona be tano kaukauna dekenai ia raka-lasi. Unai murinai Iona be Nineva dekenai ia lao. Unai ese ita ia hadibaia Iehova ena hereva ibounai ita kamonai henia be gau badana, ani?