Jona nehundju enene
EHUNGI 70
Jona nehundju enene
TARA komurumendu ngu ri momeva. Eye u ri moumba tjinene, katjiperi? Ehundju ndo ri ri pokumuṋiṋa! Ove mo tjiwa kutja omurumendu ngwi ouṋe? Ena re oJona. Indjeye tu tare kutja eye wa hita vi moumba ounene nao.
Jona omuprofete waJehova. Kape kapitire oruveze orure kombunda yonḓiro yomuprofete Elisa indu Jehova tja raera Jona: ‘Twende kotjihuro tjaNinive. Ourunde wovature vatjo ouingi tjinene, nu ami me vanga kutja u kahungire ku nawo ohunga nouvi wawo.’
Nungwari Jona kaa vanga okuyenda. Okutja eye wa ronda moskepi ndjaai twara ondjira yarwe ndji he ri yokuyenda ku Ninive. Jehova ka ri nonyuṋe indu Jona tja tupuka. Okutja eye wa hinda otjivepo otjinamasa. Otjivepo tji tja ri otjinamasa tjinene ngandu oskepi tji ya ri moumba wokuṱomwina. Ovaungure vomoskepi va tira tjinene, nowo va urakana koomukuru vawo.
Korusenina Jona wa tja ku wo: ‘Ami mbi rikotamena ku Jehova, Mukuru ngwa mema eyuru nehi. Nu ami mba hene koviungura Jehova mbye ndji raere kutja hi tjite.’ Okutja ovaungure vomoskepi ve mu pura: ‘Ngatu tjite vi kutja okuvare ku porimane?’
Jona we ve zira na tja: ‘Ndji yumbeye mokuvare, nu okuvare otji maku porimana.’ Ovaungure vomoskepi kaave vanga okutjita nao. Nungwari otjivepo tji tja ryamena ko, owo va ṱokumuyumba mokuvare. Tjimanga otjivepo tja wa pehi nokuvare kwa porimana.
Indu Jona tja ṱomwina momeva, ehundju enene re mu ṋiṋa. Nungwari eye ka kokere. Eye wa ri mezumo rehundju ndo oure womayuva yetatu nomautuku yetatu. Jona wa hihamwa omutima kutja kapuratenene ku Jehova nokutja ka ire ku Ninive. Ove mo tjiwa kutja eye wa tjita tjike?
Jona wa kumba ku Jehova okuningira ombatero. Okutja Jehova wa tjita kutja ehundju ri kungire Jona pomukuro. Kombunda yanao Jona wa ya ku Ninive. Ihi matji tu hongo ounanḓengu wokutjita kangamwa atjihe Jehova tja hungire, katjiperi?
Embo rOmbeibela raJona.
