MA NAKAANAW ani li winq wank saʼ li haʼ? Li winq aʼin aj Jonas ut ok re chi nuqʼeʼk xbʼaan li kar. Qatzolaq kʼaʼut naq wank saʼ chʼaʼajkilal laj Jonas.

Laj Jonas aj kʼanjel chiru li Jehobʼa. Ak kikamk laj Eliseo naq li Jehobʼa kixye re laj Jonas: ‹Ayu saʼ li tenamit Ninive xbʼaan naq yookebʼ xbʼaanunkil li maaʼusilal. Ut tat-aatinaq chirix li xmaaʼusilalebʼ›.

Abʼan laj Jonas inkʼaʼ naraj xik saʼ li tenamit Ninive. Joʼkan naq xko saʼ jun li jukubʼ saʼ jalan chik naʼaj, najt chiru Ninive. Li Jehobʼa inkʼaʼ kiwulak chiru naq laj Jonas kiʼelelik chiru, joʼkan naq kixtaqla jun li nimla kaqsut-iqʼ. Ut xbʼaan xkawil li kaqsut-iqʼ kibʼalqʼu raj li jukubʼ bʼarwiʼ yookebʼ wiʼ chi xik. Ebʼ li yookebʼ xchʼeebʼal li jukubʼ keʼok chi tijok chiruhebʼ li xpechʼbʼil yos re naq teʼkoleʼq.

Tojaʼ naq laj Jonas kixye rehebʼ: ‹Laaʼin ninloqʼoni li Jehobʼa, li kiyiibʼank re li choxa ut li Ruuchichʼochʼ. Inkʼaʼ xinbʼaanu li xinxtaqla chi xbʼaanunkil›. Joʼkan naq ebʼ li yookebʼ xchʼeebʼal li jukubʼ keʼxye re laj Jonas: ‹Kʼaru tento tqabʼaanu aawe re naq ttuqlaaq ru li palaw?›

Laj Jonas kixye rehebʼ: ‹Kutumaqin saʼ li palaw›. Ebʼ li yookebʼ xchʼeebʼal li jukubʼ inkʼaʼ keʼraj xbʼaanunkil, abʼan naq kinimank xkawil roq li kaqsut-iqʼ, keʼxkut laj Jonas saʼ haʼ. Chirix chik aʼan kituqlaak li palaw.

Naq laj Jonas xko rubʼel haʼ, jun li nimla kar kinuqʼuk re. Abʼan inkʼaʼ kikamk ut kiwank saʼ xsaʼ li kar chiru oxibʼ kutan ut oxibʼ qʼoqyink. Laj Jonas kiyotʼeʼk xchʼool naq inkʼaʼ kiʼabʼink chiru li Jehobʼa ut naq inkʼaʼ xko saʼ li tenamit Ninive. Joʼkan naq, ma nakaanaw kʼaru kixbʼaanu?

Laj Jonas kitijok chiru li Jehobʼa re naq ttenqʼaaq. Joʼkan naq li Jehobʼa kixbʼaanu naq li kar tixxawa laj Jonas chiru chʼochʼ. Chirix chik aʼan laj Jonas xko saʼ li tenamit Ninive. Chixjunil aʼin naxkʼut chiqu naq tento tooʼabʼinq chiru li Jehobʼa.