TARA mugara ogu ana kara momema. Age kuna kara moudigu wounene, ndi ngapi? Mfi ozo kuna kuza zi ka mu mine! Ono diva asi yilye mugara ogu? Edina lyendi Jona. Tu tareni asi ngapi omu ana zi moudigu wokuhura opo.

Jona muporofete gwaJehova. Kapi pana piti siruwo sosire konyima zonomfa domuporofete Elisa apa Jehova ana tantere Jona asi: ‘Zende kositata sosinene Ninivhe. Udona wovantu vamo una nenepa unene, yiyo nina hara o ka uyunge nawo kuhamena kwawo.’

Nye Jona kapi ana hara kuza. Makura ta rondo mosikepa esi sina kuza koruha naropeke kutunda koNinivhe. Jehova kapi ana hafere eyi ana duka Jona. Makura ta ninkisa kakundungu gomunene. Kakundungu ta kara gomunene mokuninka asi sikepa tasi hara kudama. Vanasikepa tagu va pwaga sili, makura tava kugu kovakarunga vawo.

Makura Jona ta va tantere asi: ‘Ame kukarera Jehova, Karunga ogu ga sita eguru nevhu. Ano ame kuna kuduka kokurugana eyi ana tantera nge Jehova asi ni yi rugane.’ Vanasikepa tava mu pura asi: ‘Yinke natu ku rugana yipo ekundungu li hage?’

Jona ta tanta asi: ‘Zugumineni nge mefuta, makura efuta li liture hena.’ Vanasikepa kapi vana hara kuyirugana eyi, nye ekundungu lina didi unene makura tava zuguma mo Jona mosikepa. Poopo ekundungu makura tali hageke, ano efuta tali litura.

Jona apa ana kudama momema, emumfi lyemunene makura tali mu mini. Nye kapi ana fu. Age ta kara mezimo lyomfi zina nomutenya ntatu nomasiku gatatu. Jona ta livere unene kweyi ana pili kulimburukwa kwaJehova nokuza koNinivhe. Ono diva asi yinke nye ana rugana?

Jona ta kanderere kwaJehova a mu vatere. Makura Jehova ta ninki mfi zi fizire Jona pevhu lyekukutu. Kutunda opo Jona ta zi koNinivhe. Nani eyi kapi yina kuturonga omu ya kara nomulyo asi tu rugane nkenye yimwe eyi ana kututantera Jehova?

Buke zoBibeli zaJona.