Sturka 70

Jona Bara Inska Tara Ba

LIURA waitna kum ba kaiki kais. Witin ba trabil tara ra sa, rait apia? Baha inskika tara ba mita langki piaisa! Waitnika ba ya sapa nu sma ki? Witin nina Jona. Kaisa witin ba nahki pât ailal diman sapa kaikaia.

Jona ba Gâd prapitka kan. Prapit Ilaisya pruan wina wihka apia kan, Jehova mita Jona ra win: ‘Man Ninibi taunka tara ra was. Kan upla saurka nani ba tara pali sa, bara want sna man baha dukyara wih aisama.’

Sakuna Jona waia want apia kan. Baha mita witin duri tara kum ra aimaki, Ninibi tanira waia ba wina, tnaya wala ra wan. Witin plapi kan ba, Jehova yamni kaikras kan. Baha mita yaban pasa tara kum krauan. Uba karna kraui kan ba mita duarka tara ba rungwuya kan. Duri ra wark taki nani ba uba sirang iwi, ai gâdka nani ra wini bangwan help munbia dukyara.

Las kat Jona bila: ‘Yang Jehova, heven bara tasba paskan Gâdka ba ra mayunisna. Witin dia ai win ba daukaia apia dukyara plapisna.’ Bara duri ra wark taki nani ba makabi walan: ‘Yang nani dia mai daukrika pasa na takasbia ki?’

‘Kabu ra ai lulki bangws bara kabu ba lamni takbia,’ Jona mita win. Sakuna witin nani ba baku dauki bangwaia want apia kan, ban sakuna payaska ba kau karna krauan pyua ra, Jona ra kabu ra lulkan. Minitka ra payaska ba takaskan, bara kabu ba kli lamni takan.

Jona ba rungwi iwan taim, inska tara kum mita langkan. Sakuna witin pruras kan. Yu yuhmpa, tihmia bara kakna ra inskika ba byara bilara kan. Witin Jehova bila wali Ninibi ra waras kan ba dukyara uba ai kupia ra luki kan. Baha mita, witin dia daukan sapa nu sma ki?

Jona, Jehova ra ai pura suni help makaban. Bara Jehova mita inskika ba ra yaban Jona ra brisi kabu un ra aikaban. Baha ningkara, Jona Ninibi ra wan. Jehova dia wi ba bila walaia ba kulkanka tara bri ba, naha ra wan marikras sa ki?

Baibil ra Jona 1–4 bukka ba.