TALA omulume ou momeva. Ukahi movitateka ovinene, hatyoko? Ombisi ei maimunyinipo. Utyii olie omulume ou? Enyina liae o Jona. Tutalei oñgeni elipaka movitateka evi ovinene.

Jona omuuli wa Yehova. Konyima yononkhia mba Eliseu, papita vala omuvo wehehi, iya Yehova atolela Jona okuti: ‘Enda kepundaumbo enene lio Ninive. Ouvi wovanthu ovo walinga omunene. Nahanda wende ukevepopile tyo.’

Jona ankho kahandele okuenda. Moluotyo, walonda mowato umue ankho wenda kotyilongo tyimue tyikala kokule unene no Ninive. Yehova kahambukilwe mokonda ankho Jona ukahi nokutila. Iya Yehova apindula epukupuku limue enene, iya owato auhande okunyingila kohi yomeva. Ovaendesi vowato avakala unene nouoma, avahimbika okuita ekuateso kono huku mbavo.

Okuhulako Jona evetolela okuti: ‘Ame ndyifenda Yehova, Huku walinga eulu noohi. Ndyikahi nokutila ovilinga natumwa na Yehova.’ Iya ovaendesi vowato avemupulu okuti: ‘Oityi tuna yokulinga opo epukupuku eli, litule?’

Jona akumbulula ati: ‘Ndyumbei melunga, opo litule.’ Anthi, ovaendesi vowato ankho kavahandele okumuyumba melunga. Mahi, etyi epukupuku lieliyawisa, avemuyumbu melunga. Iya omphepo aitulu liwa liwa, iya elunga alihiliya.

Etyi Jona anyingila kohi yomeva, wanyinuapo nombisi imue onene. Mahi, kankhile. Wakala ovitenya vitatu, no vinthiki vitatu meimo liombisi oyo. Jona elivele unene, mokonda yetyi ehetavelele ku Yehova. Utyii oityi alinga?

Jona welikuambela ku Yehova okuita ekuateso. Iya Yehova ayeke ombisi ikemuhandyele kondye yelunga keheke liakukuta. Konyima yotyo, Jona aende ko Ninive. Otyo katyitulongesa okuti tyakolela unene okulinga etyi Yehova atuma?