NEA nrenya ne mɔɔ wɔ nzule ne anu la. Ɔ nwo ɛhyele ye kpalɛ, ɔnle zɔ ɔ? Fɛlɛ ne ɛlɛba ame ye! Ɛze nrenya ye sonla holɛ ɔ? Bɛfɛlɛ ye Dwona. Maa yɛnlea deɛ mɔɔ ɔti ɔ nwo ɛhyele ye kpole la.

Dwona le Gyihova ngapezonli. Ngapezonli Yilaehya wule la yeangyɛ biala yɛɛ Gyihova zele Dwona kɛ: ‘Kɔ suakpole Nenɛvɛ mɔɔ ɛlie duma kpole la azo. Menli mɔɔ wɔ sua ne azo la ɛtane ɛyɛ kpole somaa, na mekulo kɛ ɛka nwolɛ edwɛkɛ ɛkile bɛ.’

Noko ɛnee Dwona ɛngulo kɛ ɔkɛhɔ. Ɔti ɔvole meli mɔɔ ɛngɔ Nenɛvɛ na emomu ɔlɛkɔ ɛleka gyɛne la anu. Ɛnee Gyihova anye ɛnlie nwolɛ kɛ Dwona ɛlɛnriandi la. Yemɔti Ɔmanle ahumu kpole bie dule. Ɔdule kpole mɔɔ ɛnee asɛɛ meli ne ɛbutu ɛwie a. Menli mɔɔ ka meli ne la ahonle dule kpalɛ, na bɛdeɛdeanle nu bɛzɛlɛle bɛ nyamenle ne mɔ moalɛ.

Amozii Dwona hanle hilele bɛ kɛ: ‘Mesonle Gyihova, Nyamenle ne mɔɔ bɔle anwuma nee azɛlɛ ye la. Melɛnriandi meavi mɔɔ Gyihova ɛze me kɛ menyɛ la anwo.’ Menli mɔɔ ka meli ne la bizale ye kɛ: ‘Duzu debie a yɛva yɛyɛ wɔ na ahumu ye agua amaa yɛ a?’

Dwona buale bɛ kɛ: ‘Bɛvuandi me bɛdo nyevile ne anu, na nyevile ne bagua fɛɛnye.’ Ɛnee menli mɔɔ ka meli ne la ɛngulo kɛ bɛkɛyɛ, noko mekɛ mɔɔ ahumu ne anloa yɛle se la bɛvuandinle Dwona bɛdole nyevile ne anu. Ɛkɛ ne ala ahumu ne gyakyile, na nyevile ne guale diinyi.

Mekɛ mɔɔ Dwona ɛlɛnoma la, fɛlɛ kpole bie ramenle ye. Noko yeanwu. Ɔlile kenle kɔkɔlɛ nsa, alehyenlɛ nee aledwolɛ wɔ fɛlɛ ne akunlu. Dwona nlunle ɔ nwo kɛ yeandie Gyihova na yeangɔ Nenɛvɛ la. Ɔti ɛze mɔɔ ɔyɛle a?

Dwona zɛlɛle Gyihova ɛkɛ ne moalɛ. Akee Gyihova manle fɛlɛ ne hɔkpule Dwona dole file zo. Ɛhye anzi Dwona hɔle Nenɛvɛ. Asoo ɛhye ɛngile kɛzi nwolɛ hyia kɛ yɛtie edwɛkɛ biala mɔɔ Gyihova kɛha la ɔ?