70 yachachiy

Jonás jatun challwawan

CHAY runata yaku ukhupi qhawariy. Mana allinchu kachkan, ¿ichari? ¡Chay jatun challwaqa uquykunqa! ¿Pichus chay runa kasqanta yachankichu? Payqa Jonás sutikun. Qhawarina imaynatachus kayjina llakiypi rikhurisqanta.

Jonasqa Jehovap profetan. Eliseo wañupusqanmanta qhipanman Jehová Jonasta jinata kamachirqa: ‘Nínive jatun llaqtaman riy. Saqra ruwasqasninku may chhikaña, chayta parlamunaykita munani’, nispa.

Jonasqa mana riyta munanchu. Chayrayku juk barcoman wichariytawan, Ninivemanta juknin ladoman ripun. Jehovaqa ayqisqanmanta phiñakuspa, manchayta parachimun. Barcotaq manaña tuytuyta atichkarqachu. Chaypi kaqkunataq, mayta mancharikuspa, diosninku yanapananpaq qhaparirqanku.

Chayllapi, Jonás parlarqa: ‘Ñuqa Jehová Diosta yupaychani, pichus cielota kay Jallpʼatawan ruwapta. Jehová ruwanayta niwasqanmanta ayqichkani’, nispa. Chayrayku runas tapurqanku: ‘¿Imatataq qamwan ruwasqayku quchap yakusnin tiyaykunanpaqri?’, nispa.

‘Jatun quchaman wikchʼuykuwaychik, quchap yakusnintaq tiyaykukunqa’, nispa Jonás nirqa. Paykunataq mana chayta ruwayta munarqankuchu, chaywanpis astawan wayraptin Jonasta jatun quchaman wikchʼurqanku. Chanta yakuqa jukllata tiyaykurqa.

Jonás jatun quchaman chinkaykuchkaptin, may jatun challwa payta uquykurqa. Chaywanpis, payqa mana wañurqachu. Kimsa pʼunchayta, kimsa chʼisitawan challwap wisanpi kakurqa. Jonasqa, mana Nínive llaqtaman risqanmanta mayta pesachikurqa. Kunantaq, ¿imatataq Jonás ruwarqa?

Jonasqa Jehovamanta yanapayninta mañakurqa. Chayrayku, Jehová chay jatun challwata lanzachispa, chʼaki jallpʼaman Jonasta wikchʼuchirqa. Chanta Jonás Nínive llaqtaman rirqa. ¿Manachu kay Jehovata kasukunanchikpaq yanapawanchik?

Bibliamanta Jonás libro.