CHAWILAʼ wajun achi kʼo pa ri jaʼ. Sibʼalaj uxibʼim ribʼ, ¿La jewaʼ kabʼij at? ¡Ri jun nimalaj kar kutij bʼik! ¿La awetaʼm jachin laʼ wajun achi riʼ? Jonás ubʼiʼ. Chaqilaʼ suche xubʼan wariʼ ri achi.

Jonás are jun ajqʼaxal utzij Jehová. Chiʼ naj täj kamnäq chi ri Eliseo Jehová xubʼij wariʼ che Jonás: ‹Jat pa nimalaj tinamit Nínive. Ri winaq rech Nínive sibʼalaj nim ketzalal kʼolik, xuqujeʼ xubʼij che kchʼaw chirij wariʼ kukʼ wa täq winaq riʼ›.

Jonás kraj täj xbʼek. Rumal laʼ xok bʼi pa jun barco che kbʼe naj che Nínive. Jehová utz ta xrilo che Jonás xanmaj bʼik. Rumal laʼ xubʼano che xpe jun nimalaj kaqʼiqʼ, o tew, rukʼ jabʼ puwiʼ ri jaʼ. Sibʼalaj nim rumal laʼ ri barco xajubʼiqʼ, o jbʼeʼ, xraj che xok bʼik pa ri jaʼ. Ri achijabʼ rech ri barco sibʼalaj xkexibʼij kibʼ, xkebʼij chike ri täq kidios che keʼutoʼ.

Tekʼuriʼ, Jonás xubʼij: ‹In kinya uqʼij ri Jehová, ri Ajawaxel ri xubʼan ri kaj xuqujeʼ ruwäch ulew. Tijan kinanmaj bʼi chuwäch rumal che kwaj täj kinbʼano ri xubʼij Jehová chwe›. Rumal waʼ ri täq achijabʼ xketa che: ‹¿Su kqabʼan chawe rech kqʼax wajun kʼäx?› Xechaʼ che.

‹Chenikʼaqa bʼi pa ri jaʼ, tekʼuriʼ ri jaʼ ktaneʼik›, xchaʼ Jonás. Ri täq achijabʼ rech ri barco kkaj täj kkebʼan wariʼ, tekʼuriʼ chiʼ ri kaqʼiqʼ, o tew, xpe mas, rumal laʼ xkeya bʼi Jonás pa ri jaʼ. Chiʼ xkebʼan wariʼ ri kaqʼiqʼ xtaneʼik, ri jaʼ xubʼan chi utz.

Chiʼ Jonás xok bʼi pa ri jaʼ, jun nimalaj kar xutij bʼik. Tekʼuriʼ Jonas xkam täj. Oxibʼ qʼij xuqujeʼ oxibʼ chaqʼabʼ xkʼajeʼ chupam wajun kar. Jonás sibʼalaj kʼäx xunaʼ che xunimaj ta ri Jehová che kbʼe pa Nínive. Rumal laʼ, ¿La awetaʼm su xubʼano?

Jonás xubʼan uchʼawem che Jehová xuqujeʼ xuta che, che kutoʼo. Rumal laʼ Jehová xubʼano che wajun kar riʼ xubʼan uxaʼoj xa jeriʼ xresaj loq ri Jonás pa chaqiʼj ulew. Tekʼuriʼ, Jonás xbʼe pa Nínive. ¿La kukʼut wariʼ che qawäch che rajawaxik che kqabʼan ronojel ri kubʼij Jehová chaqe?