AKARA ana ra i teia tangata i roto i te tai. E aka manamanata tikai tona, me kare ainei? Ka apukuia aia e te ika! Kua kite koe e koai teia tangata? Ko Iona tona ingoa. Ka akara tatou e akapeea aia i o ei ki roto i teia aka manamanata.

E peroveta a Iona na Iehova. Kare i roa i muri ake i te mate anga te peroveta ko Elisaia i akakite ei a Iehova kia Iona e: ‘Aere koe ki te oire maata o Nineve. E maata tikai te kino o te tangata i reira, e ka inangaro au ia koe kia tuatua kia ratou no runga i te reira.’

Inara kare a Iona e inangaro ana i te aere. I reira kua aru aia i tetai pai e aere ra ki tetai tua ke mai ia Nineve. Kare a Iehova i rekareka ana ia Iona no tei oro aia. No reira kua akatupu Aia i tetai uriia maata. Kua ririnui roa te uriia e kua vaitata te pai i te opu ki raro i te tai. Mataku tikai te au mataro, e kua kapiki i to ratou au atua no te tauturu.

I te openga kua akakite a Iona kia ratou e: ‘E akamori ana au ia Iehova, te Atua tei anga i te rangi e te enua. E te oro nei au mei te rave i te angaanga a Iehova i akakite mai kia rave au.’ Kua ui i reira te au mataro e: ‘Eaa ta matou ka rave kia koe kia akamutu te uriia?’

‘E titiri iaku ki roto i te tai e ka marino akaou i reira te tai,’ i karanga ai a Iona. Kare te au mataro i inangaro ana i te rave i te reira, inara i te ririnui anga atu te uriia kua titiri ratou ia Iona ki roto i te tai. Taua taime rai kua akamutu te uriia, e kua marino akaou te tai.

Ia Iona e opu atura ki raro i te tai, kua apukuia aia e tetai ika maatamaata. Kare ra oki aia i mate. E toru ra, e toru po iaia i roto i te kopu o te ika. Kua tataraara tikai a Iona e kare aia i akarongo kia Iehova kia aere ki Nineve. No reira kua kite koe e eaa tana i rave?

Kua pure a Iona kia Iehova no te tauturu. I reira kua maani a Iehova i te ika kia ruaki mai ia Iona ki runga i te enua maro. Muri ake i te reira kua aere atu a Iona ki Nineve. Kare ainei teia e apii mai ana ia tatou e e puapinga tikai no tatou i te rave i tetai ua atu mea ta Iehova ka tuatua mai?