AMLOLE mundujo m’mesimo. Jwalakwe asimene ni yipwetesi yejinji, ngati m’yoyo? Cimsombaco cisigele panandi kummila! Ana akummanyilila munduju? Lina lyakwe lili Yona. Kwende tulole yayatendekwe kuti asimane ni yakusawusya yejinji.

Yona ali jwakulocesya jwa Yehofa. Pali papite ndaŵi jamnono ciwile Elisa, Yehofa akumsalila Yona kuti: ‘Mjawule ku msinda wekulungwa wa Ninefe. Ŵandu kweleko asakele mnope, ni ngusaka kuŵeceta ni jemanjajo pakwamba ya kusakala kwawoko.’

Nambo Yona ngakusaka kwawula kweleko. Sambano jwalakwe akukwela liboti ni kwawula mbali jakulekangana ni ku Ninefe. Yehofa ngakusangalala ni kutila kwa Yona. Sambano Yehofa akutendekasya cimbungo cekulungwa kupuga. Caliji cakogoya mnope mwati libotilyo lyaliji pangosi. Ŵakwendesya libotiwo wakamwile mnope woga, ni akugumila kwa milungu jawo kuti jakamucisye.

Pambesi pakwe Yona akwasalila jemanjajo kuti: ‘Ngusalambila Yehofa, Mlungu juŵapanganyisye kwinani ni cilambo capasi. Ni une ngutila kuti ngatenda yasalile kutenda.’ Sambano ŵakwendesya libotiwo akum’wusya kuti: ‘Ana tutende namwe cici kuti cimbungoci cilece?’

Yona akwanga kuti: ‘Ambonye m’nyasamo, ni nyasaji cijitondoŵe.’ Ŵakwendesya libotiwo ngakusaka kutenda yeleyi, nambo cimbungoco cajendelecele kusakalilasakalila. Pambesi pakwe Yona akumponya m’mesi. Ndaŵi jijojo cimbungo cila cikuleka, ni nyasajo jikutulalasoni.

Yona pakutiŵila m’mesi, cimsomba cekulungwa cikummila. Nambo ngakuwa. Kwamasiku gatatu akutama m’matumbo mwa cimsomba. Yona akulitendela canasa mnope ligongo nganapikanila Yehofa pangajawula ku Ninefe. Ana akumanyilila yakutenda?

Yona akupopela kwa Yehofa kuti amkamucisye. Kaneko Yehofa akutendekasya cimsomba cila kumlukulila kumkuli. Pambesi pa yeleyi Yona akwawula ku Ninefe. Ana yeleyi ngayikutujiganya umbone wakutenda cilicose catusalile Yehofa?