Stori 71: God i Promes Wan Paradaes
PIJA ya i soemaot paradaes. Maet hem i klosap sem mak long vison we God i givim long profet Aesea we i stap laef jes afta long Jona.
Tok ya paradaes i minim “garen” no “ples blong spel.” ?Pija ya i mekem yu yu tingbaot wan narafala pija we yu luk finis long buk ya? Hem i olsem naesfala garen ya we Jeova God i wokem blong Adam mo Iv. ?Be yu ting se wan dei, olgeta ples long wol ya bambae oli kam paradaes?
Jeova i talem long profet Aesea blong raetemdaon tok blong hem long saed blong paradaes ya we ol man blong Hem bambae oli stap long hem long fiuja. Hem i se: ‘Wael dog mo pikinini blong sipsip bambae tufala i save stap wanples nomo, we tufala i fren gud. Ol pikinini blong buluk mo ol pikinini blong laeon bambae oli stap kakae wanples, mo smol pikinini nomo bambae i naf blong lukaot long olgeta. Mo bambae smol pikinini i save go pleplei stret long ples we posen snek i stap long hem.’
Plante man oli talem se: ‘Samting ya i no save hapen. Stat long taem bifo olgeta, i gat trabol long wol ya, mo bambae i stap olsem gogo i no save finis.’ Be traem tingbaot: ?Ples we God i wokem blong Adam mo Iv i stap long hem, hem i olsem wanem?
God i putum Adam mo Iv long wan paradaes. Tufala i lusum naesfala hom ya from we tufala i no moa obei long God. Biaen, tufala i kam olfala mo tufala i ded. God i mekem promes se bambae i givim ol samting ya we Adam mo Iv tufala i bin lusum, i go long ol man we oli lavem hem.
Long paradaes long fiuja, bambae i no gat samting we i save spolem man mo mekem ples i kam nogud. Bambae i gat pis olwe. Ol man bambae oli glad mo bodi blong olgeta bambae i strong mo helti. Bambae i olsem we God i wantem fastaem. Biaen, bambae yumi tokbaot olsem wanem God bambae i mekem paradaes ya i kamtru.
Aesea 11:6-9; Revelesen 21:3, 4.
Ol Kwestin
- ?Aesea hem i hu? ?Hem i laef long wanem taem? ?Jeova i soemaot wanem long hem?
- ?Tok ya “paradaes” i minim wanem? ?Tok ya i mekem yumi tingbaot wanem?
- ?Jeova i talem long Aesea blong raetemdaon wanem tok long saed blong Paradaes long fiuja?
- ?From wanem Adam mo Iv tufala i lusum naesfala hom blong tufala?
- ?Jeova i mekem wanem promes long ol man we oli lavem hem?
Sam narafala kwestin
- Ridim Aesea 11:6-9.
?Baebol i talem wanem blong soemaot pis we bambae i stap bitwin ol anamol mo ol man long niufala wol? (Sam 148:10, 13; Aes. 65:25; Esik. 34:25)
?Olsem wanem ol tok blong Aesea i stap kamtru long saed blong spirit, long medel blong ol man blong Jeova tede? (Rom 12:2; Efes. 4:23, 24)
?Yumi mas presem hu ya from ol bigfala jenis long fasin blong plante man tede mo long niufala wol tu? (Aes. 48:17, 18; Gal. 5:22, 23; Fil. 4:7)
- Ridim Revelesen 21:3, 4.
?Baebol i talem wanem blong soem se taem God i mekem ples blong hem wetem ol man, hemia i no min se bambae hem i kamdaon long wol be i min se bambae i lukaotgud long yumi? (Lev. 26:11, 12; 2 Kron. 6:18; Aes. 66:1; Rev. 21:2, 3, 22-24)
?Wota blong ae mo soa we bambae i finis, hem i kamaot from wanem samting? (Luk 8:49-52; Rom 8:21, 22; Rev. 21:4)