Maana 71nan

Ala ye alijinɛ layidu ta

NIN yɔrɔ ye alijinɛ ja sugu dɔ de ye, laala i ko Ala tun y’a jira cogo min na a ka kira Esayi la. Esayi nana waati dɔɔnin kira Jonasi kɔfɛ.

“Alijinɛ” kɔrɔ ye ko “nakɔ” walima ko “jirimayɔrɔ.” Yala o tɛ i hakili jigin fɛn dɔ la, an ye min ye ka tɛmɛ nin gafe kɔnɔ wa? Jehova Ala tun ye nakɔ cɛɲumanba min dilan Hadama ni Hawa ye, nin yɔrɔ bɔlen bɛ kosɛbɛ o nakɔ fɛ. Tari di? Nka, yala dugukolo yɔrɔ bɛɛ bɛna kɛ alijinɛ ye don dɔ la wa?

Alijinɛ kura min bɛna sigi Ala ka mɔgɔw ye, Jehova y’a fɔ kira Esayi  k’a ka nin sɛbɛn ko: ‘Kungo wulu ni saga na sigi hɛrɛ la ɲɔgɔn fɛ. Misiden ni warabaden na dumuni kɛ ɲɔgɔn fɛ. Denmisɛn dɔ na kɛ u gɛnbaga ye. Hali ni den fitinin bɛ tulon kɛ sa bagama kɛrɛfɛ, sa tɛna kojugu kɛ a la.’

Mɔgɔ caman bɛna a fɔ ko: ‘O tɛ se ka kɛ abada. Gɛlɛya kɛra dugukolo kan tuma bɛɛ, gɛlɛya bɛna kɛ dugukolo kan tuma bɛɛ fana.’ Nka e ka miiri nin na: Ala tun ye yɔrɔ sugu jumɛn di Hadama ni Hawa ma walisa o ka kɛ u ka yɔrɔ ye?

Ala tun ye Hadama ni Hawa bila alijinɛ de kɔnɔ. U ma Ala ka kuma mɛn minkɛ, o de y’a to u bɔnɛna u ka yɔrɔ cɛɲumanba la, u kɔrɔla, u sara fana. Nka, Hadama ni Hawa bɔnɛna fɛn minnu na, Ala ye layidu ta ko ale bɛna o fɛn kelenw di a kanubagaw ma.

Alijinɛ kura nata kɔnɔ, tɔɔrɔko si, walima tiɲɛniko si tɛna kɛ tun. Hɛrɛ dafalen de bɛna kɛ. Mɔgɔ bɛɛ bɛna kɛnɛya ani ka hɛrɛ sɔrɔ. Ala tun b’a fɛ kow ka kɛ cogo min na a daminɛ na, a bɛna kɛ ten tigitigi. Nka Ala bɛna o kɛ cogo min na, an bɛna o ye kɔfɛ.

Esayi 11:​6-9; Jirali 21:​3, 4.