CHIZULIE chino chinasolola yimwe paraisu, ngwe yize Zambi anakasolola kuli profeta wenyi Izaia. Izaia kanakatwama ha mashimbu waze Yona te hanafu kulu.

Paraisu yinalumbunuka “munda” hanji “chimwe chihela chipema.” Shina chizulie chino chinakweulula chimwe chuma chize twamonanga mu mukanda uno? Chizulie chino chinalifwa ni munda upema uze Yehova Zambi anakalingila Alama ni Eva, nyi ngwami? Shina limwe tangwa hano hashi muheza kapwa paraisu?

Yehova yatuma profeta wenyi Izaia hanga asoneke hakutwala ku paraisu yaha yize muyiza ya atu ja Zambi. Iye yamba ngwenyi: ‘Tungunga ni mapanga makatwama hamuwika ni sambukila. Mwana ngombe ni mwana ndumba eswe makalia hamuwika, nawa mwana kemba makaasongwela kanawa. Chipwe mwana kemba kechi kamusuma, nyi maheha ni kapela.’

Atu anji mahasa kwamba ngwo: Chino chichi kalingiwa. ‘Mumu ha mashimbu eswe hano hashi hato ni lamba, nihindu muhanunga ni lamba.’ Alioze achi nyonga ha chino: ‘Kuchi te chapwa chihela chize Zambi anakahana kuli Alama ni Eva?

Zambi kanakasa Alama ni Eva mu yimwe paraisu. Ayo kanakatokesa chihela cho chipema, yapwa tushinakaji nawa yafwa mumu ayo kanakehuka kuli Zambi. Zambi kanalakenya kuli atu eswe waze akumuzanga, ngwo makaaha yuma yeswe yize Alama ni Eva anakatokesa.

Mu paraisu yaha yize muyikapwa hano hashi, niumwe makamona lamba hanji komwonona wakwihi. Muhakapwa ukulungunga ungunu. Atu eswe makapwa ni mwono upema ni kuwahilila. Muhakapwa ngwe chizechene Zambi azangile ku uputukilo. Kulutwe mba yetwe mutukalilongesa chize Zambi makayilinga.