SA I en portre en paradi ki Bondye ti’n kapab montre son profet Izai. Izai ti viv en pe letan apre Yona.

Sa mo paradi i vedir “zarden.” Eski sa paradi ki ou vwar dan sa portre pa fer ou mazin okenn keksoz ki nou’n deza vwar dan sa liv? Pa i parey sa zoli zarden ki Zeova ti fer pour Adan ek Ev? Me eski en zour later antye pou vin en paradi?

Zeova ti demann son profet Izai pour ekrir konsernan sa nouvo paradi pour son pep. I ti dir: ‘Loulou ek mouton pou viv ansanm dan lape. Bann pti bef ek bann pti piti lyon pour manz ansanm, e bann pti zanfan pou pran swen avek zot. Menm en pti baba pa pou ganny ditor si i zwe pros avek en serpan anpwazonnen.’

‘Sa pa pou zanmen arive,’ en kantite dimoun i kapab dir. ‘I’n toultan annan problenm lo later e i pou toultan annan problenm.’ Me reflesir en kou: Ki kalite lakour ki Bondye ti donn Adan ek Ev?

Bondye ti met Adan ek Ev dan en paradi. Lefe ki zot ti dezobei Bondye zot ti perdi zot zoli lakour, zot ti vin vye e zot ti mor. Sepandan, Bondye ti promet ki i pou donn bann dimoun ki kontan li tou sa ki Adan ek Ev ti’n perdi.

Dan sa nouvo paradi pou napa nanryen ki pou fer nou dimal oubyen detri nou. Pou annan lape parfe. Tou dimoun pou an bonn sante e zot pou viv ere. Tou keksoz pou parey avek sa ki Bondye ti oule okonmansman. Plitar, nou pou aprann konman Bondye pou realiz son plan.