Kukwe kira 71

Ngöböta paraíso käbämike

NETE kä bä nuäre bämikani, Ngöbö mikani tuare profeta kwe Isaías ie ye bä kwrere. Jonás ye bitikäre Isaías nünanbare.

Paraíso ye “kä bä nuäre” o “kä ükaninte kwin.” ¿Kukwe bämikani nete ne tä dre ngwen törö mäi? Jän, kä bä nuäre Ngöbö sribebare Adán bätä Eva kräke, ¿ñan ererea? Akwa, ¿ne rabai Kä jökräbiti tibien?

Kä mrä bä nuäre tä ja känenkäre juta Ngöbökwe kräke, yebätä profeta Isaías kukwe tikadre Jehová niebare ie. Niebare kwe ie: ‘Lobo bätä obeja nünain jäme jabe. Nibi bätä lion ngäbä mrödi jabe, aune monso chi käkwe ngübadi. Monso chi rabai ja denkä kulebra käme bäre akwa kulebra käkwe ñaka nuain tare jire.’

‘Ye ñaka rabai bare jire,’ ni kwati raba niere. ‘Käre kukwe tare nemen bare kä tibienbätä, aune käre tädi nakainkä.’ Akwa töbike, ¿Ngöbökwe Adán bätä Eva mikani nüne kä ño känti?

Ngöbö Adán bätä Eva mikani nüne kä bä nuäre känti. Ñaka Ngöbö mikani täte kwetre yebätä kä bä nuäre nianinte kän, namani umbre aune krütani. Nitre tä Ngöbö tarere ye ie niarakwe kä bä nuäre biain käbämikata kwe, nämene Adán bätä Eva kwe ye erere.

Kä mrä bä nuäre ja känenkäre yete kukwe tare ñan nuaindi jire bätä kä ñaka juain ngwarbe. Nünain jäme metre. Nitre jökrä nünain kwin aune kä rabai jutobätä Ngöbö tö namani ie kena erere. Ngöbökwe nuain ño ye biti nikwe mikai gare jai.

Isaías 11:6-9; Revelación 21:3, 4.