RETRATO daytoy ti paraiso kas mabalin nga impakita ti Dios ken mammadtona nga Isaias. Nagbiag ni Isaias kalpasan ni Jonas.

Ti paraiso kayatna a sawen “minuyongan” wenno “parke.” Saanna kadi nga ipalagip kenka ti nagpintas a hardin nga inaramid ni Jehova a Dios para kada Adan ken Eva? Addanto aldaw a ti intero a daga agbalinton a paraiso.

Imbaga ni Jehova ken mammadtona nga Isaias nga agsurat maipapan ti um-umayen a paraiso. Kunana: ‘Dagiti lobo ken kordero agtaengdanto a sitatalna. Ti urbon ti baka ken ti urbon ti leon aglanglangdanto, ket dagiti babassit nga ubbing ti mangaywanto kadakuada.’

Dadduma kunada dinto maaramid daytoy. Kunada a kanayon nga adda riribok ditoy daga, ket kankanayonto a kasta.

Ngem laglagipenyo, inkabil ti Dios da Adan ken Eva iti paraiso. Gapu laeng ta simmukirda iti Dios a napukawda ti napintas a pagtaenganda. Inkari ti Dios nga itdennanto kadagiti tattao nga agayat kenkuana dagiti bambanag a napukaw da Adan ken Eva.

Iti um-umayen a baro a paraiso, amin nasalun-atdanto ken naragsak. Isuntot’ kas pinanggep ti Dios nanipud idi punganay. Maammuantayto no kasano nga iyegto daytoy ti Dios.