ŨŨ NĨ visa wa valatiso ta ũla Ngai ũtonya kwĩthĩwa oonisye mwathani wake Isaia. Isaia aĩ thayũ o ĩvinda ĩkuvĩ ĩtina wa Yona kũkw’a.

Ũalyũlo wa valatiso nĩ “mũũnda mũseo.” Ũu nũũkũlilikany’a kĩndũ tũminĩte kwona ĩvukunĩ yĩĩ? Wĩoneka ũvw’anene vyũ na mũũnda mwanake ũla Yeova Ngai waseũvĩisye Atamu na Eva, kana tiw’o? Ĩndĩ nthĩ yonthe nĩkatw’ĩka valatiso?

Yeova eeie mwathani wake Isaia aandĩke ĩũlũ wa valatiso ĩla yũkĩte ya andũ ma Ngai. Aisye: ‘Nzũi na malondu ikekalany’a vamwe na mũuo. Tũsaũ twa ng’ombe na twana twa mũnyambũ tũkaĩsaa vamwe, na kana kanini kakaitongoeasya. O na kana kaũkenge kaikaũmĩw’a o na ethĩwa kakathaũkĩa vakuvĩ na nzoka yĩ sumu.’

Aingĩ no masye, ‘Ũndũ ũũ ndũtonya kwĩkĩka nongi. Mavinda onthe kwĩthĩĩtwe na mathĩna ĩũlũ wa nthĩ, na maikathela nongi.’ Ĩndĩ kwatata kũsũanĩa ĩũlũ wa ũndũ ũũ: Ngai anengie Atamu na Eva wĩkalo ũilyĩ ata?

Ngai aiie Atamu na Eva nthĩnĩ wa valatiso. Nũndũ wa kũlea kũmwĩw’a Ngai, mo nĩmaaisye wĩkalo woo mũseo, makũa, na makw’a. Ngai nĩwathanĩte kana akanenga andũ ala mamwendete syĩndũ ila Atamu na Eva maaisye.

Nthĩnĩ wa valatiso ĩla yũkĩte andũ maikaũmĩw’a kana kũminwa nĩ kĩndũ. Kũkeethĩwa mũuo mwingĩ. Andũ onthe makeethĩwa na mĩĩ mĩseo na ũtanu. Valatiso ĩsu ĩkeethĩwa ĩilye o tondũ Ngai wendaa yĩthĩwe ĩilye vaaya mwambĩlĩlyonĩ. Ĩndĩ ĩtina tũkeemanyĩsya ũndũ Ngai ũkeka ũu.

Isaia 11:6-9; Ũvuan’yo 21:3, 4.