TALA kifwanisu ya paladisu yina Nzambi monisaka mbikudi na yandi Esaïe. Esaïe zingaka kaka bilumbu fyoti na nima ya Jonas.

Ngogo paladisu ketendula “masamba” to “park.” Paladisu yai ya beno kemona awa keyibusa beno kima ve? Keti yau kefwanana ve na masamba ya kitoko yina Jéhovah salaka sambu na Adamu na Eva? Keti ntoto ya mvimba takuma ve paladisu?

Jéhovah kusongaka Esaïe na kutendula paladisu mutindu yau tavanda. Yandi tubaka: ‘Mbisi ya makasi na mwana dimeme tazinga na ngemba. Mwana ya ngombe na mwana ya ntambu tadya kifulu mosi mpi mwana ya fyoti tatwadisa bau. Mambu ya mbi tabwila muntu ve ata na mwana ya fyoti yina tasakana penepene na nyoka ya makasi.’

Bantu mingi tayindula nde: ‘Dyambu yai lenda salama ve. Ata kima mosi ve tabaluka awa na ntoto.’ Kansi yindula fyoti: ‘Inki kisika Nzambi pesaka Adamu na Eva?’

Nzambi tulaka bau na kati ya Paladisu. Sambu na kukolama na bau, bau vidisaka kisika na bau, bau nunaka, mpi bau fwaka. Kansi Nzambi lakaka na kupesa na bantu yina kezolaka yandi yonso yina Adamu na Eva vidisaka.

Na kati ya paladisu yina ya mpa, ata mambu ya mbi tasalama ve. Bantu yonso tazinga na ngemba, bau tavanda na mavimpi ya mbote mpi na kyese. Mambu yonso tavanda mpila Nzambi zolaka yau na luyantiku. Beto tamona na bankenda kelanda nki mutindu Nzambi talungisa lukanu yina.