NA PARADAYS dis na di pikchɔ. I tan lɛk di wan we Gɔd bin sho in prɔfɛt we nem Ayzaya. Ayzaya bin de afta Jona day.

Paradays na fayn gadin. I de mek wi mɛmba sɔntin we wi bin dɔn si na dis buk. I tan lɛk di fayn gadin we Jiova Gɔd bin mek fɔ Adam ɛn Iv, nɔto so? Bɔt yu fil se di wan ol wɔl go ɛva bi Paradays?

Jiova tɛl Ayzaya fɔ rayt bɔt aw Paradays go tan lɛk fɔ Gɔd in pipul dɛn. I tɛl am se: ‘Wulf ɛn ship go ple togɛda. Kaw pikin ɛn layɔn pikin go it wanples, ɛn na smɔl pikin go mɛn dɛn. Smɔl pikin sɛf we de sɔk bɔbi go ple nia bad snek, bɔt di snek nɔ go du am natin.’

Sɔm pipul dɛn go se: ‘Dis nɔ go ɛva apin. I dɔn te we trɔbul de na di wɔl, ɛn trɔbul go de te go.’ Bɔt uskayn ples yu tink se Gɔd bin put Adam ɛn Iv?

Gɔd bin put Adam ɛn Iv na wan fayn ples. Bɔt Gɔd drɛb dɛn de bikɔs dɛn nɔ du wetin i tɛl dɛn fɔ du. So dɛn bigin fɔ ol smɔl smɔl te dɛn day. Bɔt Gɔd prɔmis se di wan dɛn we lɛk am go ɛnjɔy di sem tin dɛn we Adam ɛn Iv bin de ɛnjɔy.

Ɔl di bad bad tin dɛn we de apin naw nɔ go de apin igen na Paradays. Pis go de ɔlsay. Ɔlman go gɛt wɛlbɔdi ɛn gladi at. Ɔltin go bi jɔs lɛk aw Gɔd bin want am we i mek di wɔl. Bɔt leta, wi go lan aw Gɔd go du dis.