Esimwititi 71: Karunga ta tumbwidire Paradisa
ELI kuna kara efano lyoparadisa lyokufana nampo eli ga likidire Karunga muporofete gwendi Jesaya. Jesaya kwa parukire siruwogona tupu konyima zaJona.
Paradisa kutanta asi “sikunino” ndi “sipata.” Tayi ku diworokesa kosininke simwe esi twa lironga nare mobuke ezi ndi? Azo kuna kumoneka ngwendi sikunino sosiwa esi Jehova Karunga ga ruganenene oAdamu naEva, ndi ngapi? Nye evhu nalinye ngali kara paradisa ndi?
Jehova kwa tanterere muporofete gwendi Jesaya a tjange kuhamenaparadisa zompe ezi zina kuwiza zovantu vaKarunga. Age kwa tente asi: ‘Mambungu nononzwi ngayi kara kumwe mombili. Yitana novanyimegona ngayi lya kumwe, ano vanonagona yiwo ngava yi takamesa. Nampili munonagona nga danene pepi nezoka lyouhungu, kapi ngayi kara siponga.’
Wovanzi tava tanta asi: ‘Eyi kapi tayi vhuru kuhoroka. Pevhu kwa kara po maudigu siruwo nasinye esi, ntani yipo ngaga kara hena nkenye apa.’ Nye yi gazadara ko tupu si: Uturo musinke ga pere Karunga oAdamu naEva?
Karunga kwa tulire oAdamu naEva moparadisa. Yeeyi tupu va nyokere Karunga yiyo va zumbanesere uturo wawo wouwa ngosina, yiyo va kurupire nokufa. Karunga kwa tumbwidira asi nga ka pa vantu ava va mu hara yininke eyi va zumbanesere oAdamu naEva.
Moparadisa zompe ezi zina kuwiza, kwato ngayi koresa ndi yi zonagure. Ngamu kara mpora zokusikilira mo. Vantu navenye ngava kara wovakanguki ntani woruhafo. Ngayi kara ngomu tupu ga yi harerere Karunga petameko. Nye ngatu lironga konyima asi ngapi omu Karunga nga ka yi reta po eyi.
Jesaya 11:6-9; Ehororo 21:3, 4.
Mapuro
- Yilye ga kere Jesaya, siruwo musinke ga parukire, ntani yinke ga mu likidire Jehova?
- Yinke azi tanta nkango “paradisa,” ntani kosinke azi ku diworokesa?
- Yinke ga tanterere Jehova Jesaya yokutjanga kuhamena Paradisa zompe?
- Morwasinke va zumbaneserere oAdamu naEva uturo wawo wouwa?
- Yinke ana kutumbwidira Jehova kowo va mu hara?
Mapuro gokugwederera ko
- Resa Jesaya 11:6-9.
Ngapi omu adi likida Nonkango daKarunga mbili ezi ngazi ka kara pokatji koyikorama novantu mouzuni woupe?
Esikiliromo musinke lyopampepo lyononkango daJesaya lina kuhoroka mokatji kovantu vaJehova naina?
Yilye rwa wapera rupandu kerunduruko lyonkareso zovantu ngesi ntani nomouzuni woupe?
- Resa Ehororo 21:3, 4.
Ngapi omu aga likida Matjangwa asi ekaropo lyaKarunga kumwe novantu pevhu kutanta asi age kuna kara po mosifanekeso, kapisi kuna kara po panyama?
Mahodi nokukora musinke ngava ka gusa po?
