Icisimicisyo 71: BaLesa Balaya Paladaiso
ICI cikope ca paladaiso cili koti nicilya baLesa balangisye Yisaya uwakusimika wabo. Yisaya alikeleko impindi inini panuma yakwe Jona.
Paladaiso ilapilibula “ibala” neli “paaka.” Kani cakwanusyako cimo ici twabwenepo muli lili’buku? Cilukuboneka ukupalana makosa ne bala iliweme ili baYehoba Lesa balengeele Adama na Efa, tefyenka? Pano kani icalo conse cikabapo paladaiso?
BaYehoba balibulile Yisaya uwakusimika wabo ukulemba pa lwa kwisa kwa paladaiso ya bukumo iya bantu ba baLesa. Alilabile ati: ‘Imimbulu ne mbelele sikekala pamo mu butende. Abana ba ŋombe ne bana ba nkalamu bakaliila pamo, ne bana abanice bakafilama. Ne mwana umwanice takasomesiwa kani afukanina apepi ne nsoka iikali.’
Abengi bangalabila ati: ‘Ici tacikacitikapo. Lyonse mu calo mulaba ukukatasiwa, kabili kukatwalilila ukubamo.’ Pano ulanguluke pali cici: Kani wali syani umusi baLesa bapele Adama na Efa?
BaLesa balibikile Adama na Efa mu paladaiso. Cali lukoso nipakuti tabaumfwilile baLesa eci balufiisye umusi wabo uuweme, balicekwile ne kufwa. BaLesa balalaya ati bakapela abantu ababatemenwe fyenka filya ifintu Adama na Efa balufisye.
Mu calo ca bukumo ica paladaiso icilukwisa tamukabapo ifikalukusomesya neli ukonala. Mukaba ubutende ubuwaminine. Bonse abantu bakaba abakosele kabili abasangalele. Cikaba fyenka filya baLesa bafwaile ati cibe pa kutanga. Pano tukasambilila kuntangile ifi baLesa bakalete’ci.
Yisaya 11:6-9; Ukufisulula 21:3, 4.
Ifyakwipusya
- Kani Yisaya ninani, nilwisa aikeleko, kabili nifindo baYehoba bamulangisye?
- Kani isiwi “paladaiso” lilapilibule’ndo, kabili nifindo ifi likwanusyako?
- Mba nifindo baYehoba bamubulile Yisaya ukulemba pali Paladaiso wa bukumo?
- Mba nindo Adama na Efa balufiisye umusi wabo?
- Kani nifindo baYehoba balaya abo ababatemenwe?
Ifyakwipusya na fimbi
- Pendeni Yisaya 11:6-9.
Kani Amasiwi abaLesa alalangisya syani ifi ubutende bukabapo pakati ka nama ne bantunsi mu calo ca bukumo? (Amasa. 148:10, 13; Yisa. 65:25; Esic. 34:25)
Kani amasiwi akwe Yisaya alukucitwa syani ku fya ku mupasi pa bantu ba baYehoba muli bulelo? (Loma. 12:2; Efes. 4:23, 24)
Kani ninani uwelelwe ukupelwa ubuleme pafi abantu balula imibelo yabo mu bwikasi bwabo bukumo ne fibakaba mu calo ca bukumo? (Yisa. 48:17, 18; Gal. 5:22, 23; Filip. 4:7)
- Pendeni Ukufisulula 21: 3, 4.
Kani Amalembo alalangisya syani ati ukwikala kwa baLesa pamo ne bantu kulapibula ifi bakabacitila, takulipo kulukwikala pamo nabo pa calo? (Lef.26:11, 12; 2 Ifye. 6:18; Yisa. 66:1; Fisu. 21:2, 3, 22-24)
Kani niisa iminsosi ne kusomenwa ifikafumapo? (Luku 8:49-52; Loma. 8:21, 22; Fisu. 21:4)
