Mungu So Oyo Paradisi Ni
A’DIKO 71
Mungu So Oyo Paradisi Ni
’DIRI e’da paradisi ni ekile ndra Mungu ni oyo ni so nabi Isaya ma tia rile ri. Isaya o’a were drata Yona ni ma vutia.
Paradisi ma efi “amvu” kaniku “oce.” Ega mi eyo azi ndra amani oni buku ’di ma alea ’bo ni si ra ya? Eri trotro amvu ndra onyiru Yehova Mungu ni fe Adamu pini Eva be ’dale ku ya? Te ada ada nyaku dria ni nga eca paradisi ru ra ya?
Yehova ’yo nabi Isaya ma si e’yo paradisi o’diru emupi ’ba Munguni ’diyi ni ri ma dria. Yo dini: ‘Balau pi kabilo pie yi nga nya tualu asi anzu si. Kajomva pi kami mva pie yi nga nya tualu azini mva werea ru ri nga eyi ma dri ceni. Mva werea ni nga avi ’bule ori enyata beri nia te ngani eri ga ku.’
’Ba kakau ecoki ’yo kini: ‘Di ngani i ’ye ku. Ndra e’dozu drio candi nyaku dria ’dia ci dika eri nga mu drile asi kokoru.’ Te mi ega nga: Aku Mungu ni fe Adamu pini Eva be ri ndra ngole?
Mungu ’ba ndra Adamu pi Eva be paradisia. Aviki ndra aku eyi ni ndrizaru ’da i agbari eyini Mungu ma ti erizu ku risi ani ngaki de azini odra ra. Mungu so oyo kini i nga afa dria ndra Adamu pi ni avi Eva be ’diyi eji ’ba i lepi ’diyi ni.
Paradisi o’diru emupi ’di ma alea afa azini nga ’bani candi fe kaniku ’ba dri ja ’dini ku. Asi anzu adari nga adri ’da ni. ’Ba dria ni nga o’a rua ale be dika ayikosi. ’Ba dria ni nga ovu ekile ndra Mungu ni le e’doza nia rile. Te ama nga Mungu ni ojata ’diyi eji ngoni ngoni’ari oni indo.
