KO E fakatino a ē he parataiso tuga ne liga fakakite he Atua ke he perofeta haana ko Isaia. Ne moui a Isaia he nakaila leva ia e mole atu ha Iona.

Ko e parataiso kua kakano “kaina” po ke “paaka.” Fakamanatu nakai ki a koe hagaao ke he taha mena kua fitā he kitia e tautolu i loto he tohi nei? Kua teitei ni ke tuga e kaina fulufuluola ne taute e Iehova ko e Atua ma ha Atamu mo Eva, pihia nakai? Ka e to eke nakai e lalolagi katoa mo parataiso?

Ne tala age a Iehova ke he perofeta haana ko Isaia ke tohi hagaao ke he parataiso foou hane hau ma e tau tagata he Atua. Pehē a ia: ‘Ko e tau luko mo e tau mamoe to nonofo fakalataha mo e mafola. Ko e tau punua povi mo e tau punua leona to kai auloa, mo e to leveki he tau fanau ikiiki a lautolu ia. To nakai haofia foki e tama mukemuke ka fefeua fakatata ke he gata gagau kona.’

‘To nakai fakaai e mena nei ke tupu,’ he talahau he tokologa. ‘Na fai lekua tumau e lalolagi, mo e to pihia tumau ni.’ Ka e manamanatu la ki ai: Ko e kaina fēfē ne age he Atua ki a Atamu mo Eva?

Ne tuku he Atua a Atamu mo Eva he parataiso. Ka ko e ha laua ni a nakai omaoma ke he Atua ati galo ai e kaina fulufuluola ha laua, fuakau mo e mamate ai. Na mavehe e Atua to foaki e ia ke he tau tagata ne fakaalofa ki a ia e tau mena ne galo ia Atamu mo Eva.

He parataiso foou hane hau to nakai fai mena ka mamahi po ke moumou. To ha ha i ai e mafola mitaki katoatoa. Ko e tau tagata oti to tino malolō mo e fiafia. To tuga ni e manako he Atua he kamataaga. Ka e to fakaako a tautolu ke he puhala ka tamai he Atua e mena nei.