71 yachachiy

Dios tʼikapachamanta parlan

KAY paraisomanta dibujoqa, Diosninchik Isaías profetaman rikuchisqan. Isaiasqa Jonás wañupusqanmantaraq kawsarqa.

Paraisoqa, “huerta” chayri “tʼikapacha” niyta munan. ¿Imatataq kay dibujito yuyarichisunki? Ari, Dios Adanpaq, Evapaq ima huertata ruwapusqanman rikchʼakun. Chaywanpis, ¿tukuy Jallpʼachu paraisoman tikrakunqa?

Jehovaqa jamuq paraisomanta Isaiasniqta parlarqa: ‘Chay pacha atuqwan ovejawan jukllapi kawsarikunqanku. Waka uñawan, leonwanpis khuska mikhunqanku, chaykunatataq juk wawalla michinqa. Cascabel kataripis juskʼunpi ñuñuq wawa puqllaqta, mana imananqachu’, nispa.

Wakinkunaqa, ‘mana chayqa atikunmanchu, ichapis ninkuman, Jallpʼapiqa phutiykuna karqapuni, kallanqapunitaq’, nispa. Chaywanpis, kaypi tʼukuriy, ¿imayna wasitataq Dios Adanman, Evaman ima qurqa?

Diosninchik paykunata juk paraisopi churarqa. Chaywanpis, mana kasukusqankurayku chay kʼacha wasimanta qharquchikuspa, machuyarqanku, wañurqanku ima. Diosninchikqa payta munakuqkunaman imatachus Adán Eva ima chinkachisqankuta watiqmanta qupunqa.

Musuq paraisopiqa manaña pipis imatapis usuchinqachu, nitaq imatapis thuñinqachu. Tukuy ima may sumaq kanqa. Tukuy runa qallariypi Diosninchik munasqamanjina kusisqa tiyakunqa. Imaynatachus Dios chayta ruwananmanta aswan qhipaman yachakusunchik.

Isaías 11:6-9; Apocalipsis 21:3, 4.