KAY qawasqayki dibujoqa suma-sumaq huertam, Jehová Diosqa kayna huertatachá willakuqnin Isaiasman qawachirqa. Jonaspa wañukusqanmanta qepallatam Isaiasqa kawsarqa.

Paraiso ninanqa “huerta” ninanmi. ¿Yuyarichisunkichu kay libropi imapas qawasqaykita? Adanpaqwan Evapaq Jehová Dios suma-sumaq huerta rurasqanta, ¿aw? Hinaptinqa, ¿kaynachu kanqa enteron Allpaqa?

Jehová Diosmi willakuq Isaiasta hamuq tiempopi llaqtanpaq paraisota rurananmanta qellqananpaq kaynata nirqa: ‘Atoqwan malta carnerom hawkaña kawsanqa. Leonwan malta toropas kuskañam wiñanqaku hinaspa warmachakunam chaykunata pusanqaku. Culebrapa uchkunpa hichpanpi ñuñuq wawa pukllaptinpas manam imananqachu’ nispa.

Wakin runakunaqa ninqakuchá ‘Manam chaynaqa kanmanchu. Ñawpaqmantapunipas kay pachapiqa ñakariyllam hinaspa hinallachá kanqapas’ nispa. Ichaqa musyarikuytaqyá, ¿imayna sitiopitaq Diosqa churarqa Adantawan Evataqa?

Diosqa sumaq huertapim Adantawan Evataqa churarqa. Hinaspa Diosta mana kasukuspallankum sumaq huertankutapas qechurachikurqaku, hinaspam machuyaruspanku wañururqaku. Chaywanpas kuyaqninkunatam Diosqa prometen Adanwan Eva qechurachikusqanku allin kaqkunata qoykunanpaq.

Hamuq tiempopi allpa paraiso kaptinqa manañam imapas daño ruraqqa nitaq allpa chinkachiqpas kanqañachu. Aswanqa llapallan runakunam hawkallaña mana onqospa hinaspa kusisqallañam Diospa munasqanman hina kawsakunqaku. Chaymantaña yachasunchik imaynatam chay huertata Dios rurananmanta.