LESITFOMBE sikhombisa lipharadisi lelifanana nalelo lokungenteka Nkulunkulu walikhombisa umphrofethi wakhe Isaya. Isaya waphila ngemuva nje kwaJona.

Lipharadisi lisho “insimi” nobe “lipaki”. Lendzawo ayikukhumbuti yini ngentfo letsite loke wayibona kulencwadzi? Ibonakala ifanana nensimi lenhle Nkulunkulu Jehova layentela bo-Adamu na-Eva. Umhlaba wonkhe uyoke ube lipharadisi yini?

Jehova watjela umphrofethi wakhe Isaya kutsi abhale ngelipharadisi lelihle lataliletsela bantfu bakhe. Wabhala: ‘Imphisi iyawuhlalisana nelizinyane lemvu. Inkhonyana nelibhubhesi lelincane kuyawudla ndzawonye, nemfana lomncane uyakwelusa. Luswane angeke lulimale naludlala eceleni kwenyoka lenebutsi.’

Bantfu labanyenti bavele batsi: ‘Angeke intfo lenjena yenteke. Sonkhe lesikhatsi bekunetinkinga emhlabeni futsi tisetawuchubeka.’ Kodvwa khumbula: Lalinjani likhaya Nkulunkulu lalinika bo-Adamu na-Eva kutsi bahlale kulo?

Nkulunkulu wababeka epharadisi. Labalahlekela lelikhaya labo lelihle ngoba abazange bamlalele, futsi baguga baze bafa. Nkulunkulu wetsembise kutsi utawunika bantfu labamtsandzako indzawo lenhle lefanana naleyo leyalahlwa bo-Adamu na-Eva.

Epharadisi lelitako kute lokutawulimata labanye, nobe konakalise lendzawo. Kutawuba nekuthula lokuphelele. Bonkhe bantfu bayophila saka futsi bajabule. Kuyoba njengoba nje Nkulunkulu abefuna kube njalo ekucaleni. Njengoba sichubeka sifundza, sitawubona kutsi Nkulunkulu utakwenta njani loko.