Makani 71: Leza Wasyomezya Paladaiso
EECI ncecifwanikiso capaladaiso cilibonya kuti Leza ncaakatondezya musinsimi wakwe Isaya. Isaya wakapona kakwiindide buyo ciindi ciniini Jona naakamana kufwa.
Paladaiso caamba “muunda” naa “busena bukondelezya.” Hena eeci tacituyeekezyi cintu cimwi ncotwabona kale mubbuku eeli? Cifwanikiso eeci cilibonya mbuli muunda mubotu ooyo Jehova Leza ngwaakabambila Adamu a Eva. Hena tabusyi? Pele hena kuli buzuba nyika yoonse niiya kuba Paladaiso?
Jehova wakaambila musinsimi wakwe Isaya kulemba makani aamba zya Paladaiso mpya iilangilwa yabantu ba Leza. Wakati: ‘Baumpe ambelele baya kukkala antoomwe muluumuno. Boombe atwana twabasyuumbwa baya kucela antoomwe, imwana muniini uya kubeembela. Mwana muvwanda takalumwi nikuba kuti wasobana abwina bwanzoka nkali.’
Bantu banji balakonzya kwaamba kuti: ‘Eeci tacikonzyi kucitika. Kayi kwali mapenzi manji lyoonse anyika alimwi anakuliko lyoonse.’ Pele koyeeya buyo: Ino munzi uuli buti Leza ngwaakapede Adamu a Eva?
Leza wakabikka Adamu a Eva mu Paladaiso. Nkuti buyo tiibakamumvwida Leza ncicakapa kuti basiye munzi wabo mubotu akutalika kucembala akufwa. Leza usyomezya kuti uya kubapa bantu bamuyanda zintu nzyeena eezyo ba Adamu a Eva nzyobakajisi.
Munyika mpya yapaladaiso iilangilwa, taku cintu ciya kunyonganya naa kunyonyoona zintu. Kunakuli luumuno lwini-lwini. Bantu boonse banakujisi mibili mibotu alimwi banakukkomenyi. Kunakuli mbuli Leza mbwaakali kuyanda kumatalikilo. Pele tulaiya kabotu Leza mbwaya kucicita eeci.
Isaya 11:6-9; Ciyubunuzyo 21:3, 4.
Mibuzyo
- Ino Isaya wakali ni, alimwi ndilili naakapona, alimwi ncinzi Jehova ncaakamutondezya?
- Ino bbala lyakuti ‘paladaiso’ lyaamba nzi, alimwi ncinzi nceli kuyeekezya?
- Ncinzi Jehova ncaakaambila Isaya kulemba kujatikizya Paladaiso mpya?
- Nkaambo nzi Adamu a Eva ncobakazwida mumunzi wabo mubotu?
- Ncinzi Jehova ncaasyomezya kuli baabo bamuyanda?
Mibuzyo aimwi
- Bala Isaya 11:6-9.
Mbuti Jwi lya Leza mbolitondezya mbokuya kuba luumuno akati kabanyama abantu munyika mpya? (Int. 148:10, 13; Is. 65:25; Ezk. 34:25)
Nkuzuzikizyigwa kuli kwakumuuya kwamajwi aa Isaya kucitika kubantu ba Jehova sunu? (Balo. 12:2; Ef. 4:23, 24)
Ngwani weelede kulumbaizyigwa kukucinca kwamyoyo yabantu kucitika sunu alimwi akooko kuya kucitika munyika mpya? (Is. 48:17, 18; Gal. 5:22, 23; Flp. 4:7)
- Bala Ciyubunuzyo 21:3, 4.
Mbuti Magwalo mbwaatondezya kuti Leza mbwabeendelezya bantu ncikozyanyo cakuti nkwali pele ikutali kuti nkwali ncobeni anyika? (Lev. 26:11, 12; 2 Mak. 6:18; Is. 66:1; Ciy. 21:2, 3, 22-24)
Misozi nzi, alimwi nkuciswa kuli buti kuya kugusyigwa? (Lk. 8:49-52; Balo. 8:21, 22; Ciy. 21:4)
