¿WAN maʼ xjulakʼujol ayxa bʼa kilonejtik ja dibujo it? Jaʼi, ja tsamal kʼachinubʼ skʼulan ja Dyos sbʼaja Adán soka Eva, ¿anke jaʼi? Jun kʼachinubʼ wa stojolan «jun tsamal lugar». ¿Pe oj maʼ bʼobʼ paxuk sutanal ja Luʼumi jun tsamal lugar?

Ja Dyos yaʼa ja Adán soka Eva bʼa jun tsamal kʼachinubʼ. Yuja skʼokowe ja smandar ja Yeʼn, xchʼayawe ja tsamal snajeʼi sok awelaxiye man chamye. Ja Dyosi wa skʼapa oj yaʼ yi ja matik kʼuʼabʼal wa x-ajyiye smoki ja jastik xchʼayawe ja Adán soka Eva.

Ja kʼachinubʼ waxa wila bʼa dibujo bʼobʼta jach jastal sjeʼa yi ja Dyos ja yaluman Isaiasi. Ja yeʼn ajyi sakʼan tʼusan tsaʼan yajni cham ja Jonás.

Jyoba yala yabʼ ja yalumani a-stsʼijbʼuk yi ja xchonabʼ ja Dyos sbʼaja jastal oj ajyuk ja yajkʼachil Kʼachinubʼ jakumto. Yala: «Ja okʼil soka cheji lajan oj ajyuke. Ja yal wakax soka yal choji lajani oj waʼukeʼa, sok jun yal kerem yeʼnani oj talnanuka. Mini jas oj kʼulajuk yi jun yal alats wa xtajni bʼa stsʼeʼel jun bʼitsʼbʼichan wa xmilwani».

Pe jitsan oj yal-e: «Ja jaw mini oj bʼobʼuka. Ja bʼa Luʼumi tolabida ajyel wokolik sok tolanibida oj ajyuka». Pe pensaraʼan, ¿jastal ja sakʼanile yaʼunej yi ajyi ja Dyos ja Adán soka Eva?

Ja bʼa yajkʼachil Kʼachinubʼ jakumto mini maʼ oj yixtalaʼuk sok mini maʼ oj sjome. Oj ajyuk lamanil. Spetsanil ja ixuk winiki mini oj koʼuke chamel sok gusto oj ajyuk ja sakʼanile, junxta ni oj ajyuk ja jastal skʼana ja Dyos yajni skʼulan ja Adán soka Eva. Tsaʼan oj jnebʼtik mas sbʼaja jastal oj skʼuluk ja Dyos ja it.