UMA akgtum dibujo xakalipaxaw Katiyatni la max Jehová masiyanilh xpalakachuwina Isaías. Isaías latamalh akxni nina makgas xninit Jonás.

¿Lakapastaka akgtum xakalipaxaw Katiyatni la uma nema wix akxilhninitata unu klibro? Chuna xla, wa xastlan Katiyatni nema Dios xkamaxkinit Adán chu Eva. Pero, ¿xliʼakgtuminika Katiyatni chuna nawan?

Jehová wanilh xpalakachuwina Isaías pi katsokgwililh xlakata la natawilay xasasti xakalipaxaw Katiyatni nema aku nakamaxkiy Dios xkachikin. Dios wa: Lobos chu borregos akxtum nalatamakgoy chu nitu katilatlawanilh. Laktsu toro chu laktsu león akxtum nalatamakgoy, chu laktsu lakgkgawasan nakakuentajtlawakgoy. Maski aktsu skgata nakgamanan lakatsu niku wi luwa xaxlikana, nitu katitlawanilh.

Uma nixlikana puwankgoy makgapitsin. Akxni lakatsukukgolh kristianos kKatiyatni asta uku wi takglhuwit. Chu lakpuwankgoy pi nikxni katisputli. Pero kalakpuwanti, ¿la xwanit anta niku Jehová xkawilinit Adán chu Eva?

Dios kawililh Adán chu Eva kʼakgtum xakalipaxaw Katiyatni. Kaj xlakata pi ni kgalhakgaxmatkgolh Dios makgatsankgakgolh xakalipaxaw Katiyatni nema xkamaxkikanit, kgolonkgolh chu nikgolh. Dios wan pi wantiku paxkikgoy nakamaxkiy wantuku Adán chu Eva makgatsankgakgolh.

Anta kxasasti kxakalipaxaw Katiyatni nema aku namin nialhtiku katitlawalh tuku nitlan chu nialhtiku katimalakgsputunalh. Putum tlan nalatalalinkgoy. Putum kristianos nialh katitatatlakgolh chu xatapaxawan natawilakgoy chuna la Dios pulana xlakaskin. Alistalh nakatsiyaw la natlaway Dios xlakata xakalipaxaw nawan Katiyatni.