CIWULILICI cili ca paladaiso mpela jwele Mlungu ŵamlosisye jwakulocesya Yesaya. Yesaya ŵatemi ni umi ndaŵi ja Yona jili jigambile kumala kwene.

Maloŵe gakuti paladaiso gakusagopolela kuti “mgunda” kapena “malo gakusalala.” Ana ciwulilici ngacikwakumbusya ya cine cakwe catuciweni kala m’bukuji? Cikuwoneka cakulandana mnope ni mgunda wakusalala waŵapanganyicisye Mlungu Adamu ni Hawa, ngaŵa m’yoyo? Nambo ana cilambo cosopeci ciciŵa paladaiso?

Yehofa ŵamsalile jwakulocesya jwakwe Yesaya kuti alembe pakwamba ya paladaiso jwasambano jwakwisa kwa ŵandu ŵa Mlungu. Jwalakwe ŵalembile kuti: ‘Masogo ni ngondolo yicitama pampepe mwamtunjelele. Ŵanace ŵa ng’ombe ni ŵanace ŵa masimba cacilila pampepe, soni ŵanace ŵa ŵandu caciyisamalila. Atamose kamwanace ngasikawulala naga kakung’anda ciŵandika lijoka lya ululu.’

Ŵajinji komboleka kuŵeceta kuti: ‘Yeleyi ngaŵa mkukomboleka. Pacilambo pano paŵele pali pana yipwetesi, soni ciyijendelecele.’ Nambo agambe ganicisya. Ana Mlungu ŵapele malo gakutama gatuli Adamu ni Hawa?

Mlungu ŵaŵisile Adamu ni Hawa mu paladaiso. Nambo ligongo lyakuti jemanjaji nganapikanila Mlungu, ŵajasile malo gawo gambone, soni ŵakalambele ni kuwa. Mlungu apelece cilangano cakuti cacapa ŵandu ŵakusamnonyela yindu yaŵajasile Adamu ni Hawa.

Mu paladaiso jwasambano jwakwisa pangali caciciwulasya kapena konanga. Kuciŵa mtunjelele wamnama. Ŵandu wosope ngasalwala, soni caciŵa ŵakusangalala. Yindu yiciŵa mpela muŵasacilaga Mlungu pandanda. Nambo m’bujomu citulijiganye mwacacitendela Mlungu yeleyi