LELAʼ u dibujoi upʼéel paraíso, k-tuklikeʼ bey le eʼesaʼab tiʼ profeta Isaías tumen Diosoʼ. Isaíaseʼ kuxlaj le maʼ jach úuch kíimik Jonasoʼ.

Paraísoeʼ u kʼáat yaʼaleʼ upʼéel jatsʼuts kúuchil. ¿Yaan wa baʼax ku kʼaʼajsiktech a yáax ilmaj teʼ libroaʼ? Yaan, letiʼe jatsʼuts kúuchil tuʼux tsʼaʼaboʼob kaʼach Adán yéetel Eva tumen Dioseʼ, ¿máasaʼ? Baʼaleʼ, ¿yaan wa u sutaʼal tuláakal le Luʼum paraísoiloʼ?

Jéeobaeʼ tiaʼalaj tiʼ Isaías ka u tsʼíibt bix le túumben paraíso ku taal u kʼiinil u yilaʼal tumen u kaajal Diosoʼ. Tiaʼalaj: Lobo yéetel tamaneʼ yaan u múuchʼ kajtaloʼob ich jeetsʼelil. Mejen wakax yéetel mejen leónoʼobeʼ yaan u múul jaanloʼob, tak chéen mejen paalal kun nuʼuktikoʼob. Mix le chaambal kun báaxal naatsʼ tiʼ utúul chiʼibal kaan kun beetbil loob tiʼoʼ.

Yaʼab máakoʼob waleʼ kiaʼalikoʼobeʼ mix bikʼin jeʼel u yúuchul leloʼ, mix juntéen pʼáatak minaʼan talmiloʼob way luʼumeʼ, lelaʼ mantatsʼ kun yantal. Baʼaleʼ, chéen tukle, ¿bix le kúuchil tu tsʼáaj kaʼach Dios tiʼ Adán yéetel Evaeʼ?

Dioseʼ tu tsʼáaj Adán yéetel Eva tiʼ upʼéel paraíso. Baʼaleʼ tumen maʼ tu beetoʼob baʼax u kʼáat Dioseʼ, jóoʼsaʼaboʼob teʼ jatsʼuts kúuchiloʼ, chʼíijoʼob yéetel kíimoʼob. Dioseʼ kiaʼalik le máaxoʼob yaabiltmailoʼ yaan u kajtaloʼob tiʼ upʼéel paraíso jeʼex le tu tsʼáaj tiʼ Adán yéetel Eva kaʼacheʼ.

Teʼ túumben paraíso ku taal u kʼiin yilaʼaloʼ mix baʼal kun meentik loobiʼ mix  kun kʼaskúunaj. Yaan u yantal chúukaʼan jeetsʼeliliʼ. Mix máak kun kʼojaʼantal, tuláakal kun kiʼimaktal u yóol jeʼex u kʼáat Dios kaʼacheʼ. Tsʼoʼoleʼ yaan k-kanik bix ken u beet Dios lelaʼ.