Ododo 72

Lubanga Okonyo Kabaka Kejekia

IN INGEYO pingo laco man tye ka lega bot Jehovah? Pingo en oryeyo waraga magi i nyim keno tyer pa Jehovah? Laco-ni aye Kejekia. En obedo kabaka me kaka aryo me Icrael ma kupiny-nyi. En tye i peko madit adada. Pingo?

Pien lumony me Aciria dong guketo te kaka 10 ma kumalo-ni woko. Jehovah oweko man otimme pien jo meno onongo giraco adada. Kombeddi dong lumony me Aciria gubino woko ka lweny ki ker me kaka aryo-ni.

Kabaka me Aciria kombeddi pud ocwalo waraga acwala bot Kabaka Kejekia. Magi aye waraga ma Kejekia pud oketogi kany i nyim Lubanga-ni. Lok ma i waraga magi nywaro Jehovah, dok tito ki Kejekia pe me lweny. Man aye gin mumiyo Kejekia lego ni: ‘Ai Jehovah, larwa ki i cing kabaka me Aciria. Ci rok ducu bingeyo ni in keni aye Lubanga.’ Jehovah mono biwinyo Kejekia?

Kejekia obedo kabaka ma kite ber. En pe cal ki kabaka maraco me ker me kaka 10 me Icrael-li, nyo calo wonne Kabaka Akab ma kite rac-ci. Kejekia onongo keto tek tutwal me lubo cik ducu pa Jehovah. Pi meno, i kare ma Kejekia otyeko lega, lanebi Icaya ocwalle kwena man ma oa ki bot Jehovah: ‘Kabaka me Aciria pe bidonyo i Jerucalem. Kadi wa lamonnye mo pe binyiko cok kunnu. Pe gibicelo kadi atero acel i kom boma-ni.’

Nen cal ma i pot karatac man. In ingeyo nga ma lumony muto magi ducu obedo? Gin gubedo jo Aciria. Jehovah ocwalo lamalaikane, ci i dyewor acel lamalaika-ni oneko lumony me Aciria 185,000. Pi meno kabaka me Aciria oweko lweny ci odok paco.

Ker me kaka aryo-ni obwot, ci dano dok gubedo ki kuc pi kare mo. Ento ka kabaka Kejekia oto ci wode Manace odoko kabaka. Manace gin ki wode Amon gubedo kabaka ma kitgi raco adada. Pi meno turo cik ki tim gero dok opongo lobo woko. I kare ma lutic pa Kabaka Amon guneke woko, ci kiketo wode Yocia me bedo kabaka.

2 Luker 18:1-36; 19:1-37; 21:1-25.