¿EYMI kimimi chumngelu (chemu) tüfachi wentru llellipumekey Jewba? ¿Chumngelu elkünuy tüfachi karta (chillka) itrotripa Jewba ñi llangüll (altar) mew? Fey ta Esekia pingey. Kidu reyngey ti waywen-ngechi (sur-ngechi) epu trokiñ reñma Israel mu. Ka rupaley fütrake weda dungu mew. ¿Chumngelu?

Pu awkafe (weychafe) Asiria mu, dew apümfi ti pikun-ngechi mari trokiñ reñma am. Jewba eluñmay ñi rupan engün tüfa, ñi weda piwkengen mu chi pu che. Ka fewla, tati pu awkafe Asiria küpay ñi awkayafiel (weychayafiel) ti reyno nielu epu trokiñ reñma.

Ti rey Asiria we werkülelfi kiñeke karta ti rey Esekia. Tüfakechi karta fey ta rey Esekia elkünulelfi Ngünechen itrotripa mew. Tüfachi karta ayetuniefi Jewba, ka feypifi ta Esekia ñi eluñmawal ñi wewngeal. Feymu lle Esekia llellipuy: ‘Awem Jewba, montulmuyiñ ti Asiria rey mew. Feymu kom mapu kimay ta eymi müten Ngünechen ngey.’ ¿Allkütupeay may Jewba? 

Esekia küme rey ngey. Trürlay kakelu wedañma rey ti reyno nielu mari trokiñ reñma Israel mu, ka ñi wedañma chaw ti rey Akas. Esekia küme feyentukey kom Jewba ñi ley dungu. Feymu lle, aflu tañi llellipun, ti pelon wentru Isaia werkülelfi tüfachi werken dungu, tuwlu Jewba mew: ‘Ti rey Asiria konlayay Jerusalen mew. Iney no rume tañi pu awkafe fülkonpalayay rume. Pülkitulay kiñe pülki (flecha) no rume tüfachi waria.’

Adkintufinge ti adentun mülelu tüfa. ¿Eymi kimimi iney engün am kom tüfachi lalechi awkafe? Pu Asirio che tati. Jewba werküy tañi werken püllü, ka kiñe pun (trafia) müten tüfachi werken püllü langümfi 185.000 Asirio awkafe. Feymu lle ti rey Asiria mu amutuy.

Ti reyno nielu epu trokiñ reñma montuy, ka ti pu che niey tüngün alüñma mu. Welu dew lalu Esekia, tañi fotüm Manase rey ngerpuy. Tüfachi Manase ka fey wüla tañi fotüm Amon, rume weda rey ngefuyngu. Feymu lle ti mapu apolerpuy wedake che, ka kewafe che. Ti rey Amon, langümeyew tañi pu kona, tañi fotüm Josia reykünungey ti reyno nielu epu trokiñ reñma.