Stori 72: God i Halpem King Hesekia
?YU YU save from wanem man ya i stap prea long Jeova? ?From wanem hem i putum ol leta ya oli stap long fored blong olta blong Jeova? Man ya hem i Hesekia. Hem i king blong tufala laen blong Isrel long saot. Mo hem i kasem bigfala trabol. ?From wanem?
Ol ami blong Asiria oli spolem finis ol 10 laen blong Isrel long not. Jeova i letem samting ya i hapen, from we ol man ya oli kam nogud tumas. Mo naoia, ol ami blong Asiria oli stap kam blong faet agens long tufala laen we oli stap.
King blong Asiria i jes sanem sam leta i kam long King Hesekia. Hemia nao ol leta we Hesekia i putum long fored blong God long pija ya. Ol leta ya oli jikim Jeova, mo oli talem long Hesekia se i westem taem blong trastem Jeova. Taswe, Hesekia i prea long Jeova se: ‘Jeova, plis yu blokem ol man Asiria ya, yu sevem mifala, blong ol man blong olgeta ples long wol bambae oli save we yu nomo yu tru God.’ ?Jeova i lesin long Hesekia?
Hesekia i wan gudfala king. Hem i no folem ol nogud fasin olsem ol rabis king blong ol 10 laen blong Isrel, mo olsem papa blong hem King Ahas. Hesekia i traehad oltaem blong obei long ol loa blong Jeova. Taswe, afta we Hesekia i prea, profet Aesea i sanem toktok blong Jeova i kam long hem se: ‘King blong Asiria wetem ol soldia blong hem bambae oli no save kam insaed long taon ya Jerusalem. Bambae oli no save lego wan ara nating i kam long hem. Ol soldia ya bambae oli no save kam klosap long taon ya.’
Traem lukluk pija ya. ?Yu luk ol soldia ya we oli ded finis? Hemia ol soldia blong Asiria. Jeova i sanem wan enjel blong hem i kam, nao long wan naet, enjel ya i kilim i ded 185,000 soldia blong Asiria. King blong Asiria i sem, nao hem i aot i gobak long ples blong hem.
Jeova i sevem tufala laen blong Isrel, mo blong smoltaem i gat pis. Be afta we Hesekia i ded, pikinini blong hem Manase i kam king, mo Manase wetem pikinini blong hem Amon, tufala i folem ol nogud fasin. Ale, kantri i kam fulap bakegen long ol rabis fasin mo fasin blong kilim man. King Amon i ded long han blong wan man blong wok blong hem nomo, mo pikinini blong hem Josaea i kam king blong tufala laen ya.
2 King 18:1-36; 19:1-37; 21:1-25.
Ol Kwestin
- ?Man we i stap long pija ya hem i hu? ?Wanem bigfala trabol we hem i kasem?
- ?Wanem ol leta we Hesekia i putum long fored blong God? ?Hesekia i talem wanem long prea blong hem?
- ?Hesekia i wanem kaen king? ?Wanem tok blong Jeova we profet Aesea i talemaot long Hesekia?
- ?Enjel blong Jeova i mekem wanem long ol soldia blong Asiria, olsem pija ya i soem?
- ?Tufala laen i gat pis blong smoltaem, be wanem i hapen taem Hesekia i ded?
Sam narafala kwestin
- Ridim 2 King 18:1-36.
?Olsem wanem Rabsake we i haeman blong Asiria i traem mekem bilif blong ol man Isrel i seksek? (2 King 18:19, 21)
?Olsem wanem ol Witnes blong Jeova oli folem eksampol blong Hesekia, taem ol man oli agensem olgeta? (2 King 18:36; Sam 39:1; Prov. 26:4; 2 Tim. 2:24)
- Ridim 2 King 19:1-37.
?Olsem wanem ol man blong Jeova tede oli mekem olsem Hesekia taem trabol i kasem olgeta? (2 King 19:1, 2; Prov. 3:5, 6; Hib. 10:24, 25; Jem. 5:14, 15)
?Wanem trifala samting i hapen blong mekem se King Senakerib i lusum faet ya? ?King Senakerib i olsem pija blong hu? (2 King 19:32, 35, 37; Rev. 20:2, 3)
- Ridim 2 King 21:1-6, 16.
?From wanem yumi save talem se Manase i moa nogud i winim ol narafala king we oli rul long Jerusalem? (2 Kron. 33:4-6, 9)
