Maana 72nan

Ala ye masakɛ Ezekiyasi dɛmɛ

YALA i b’a dɔn mun na nin cɛ bɛ ka Jehova deli wa? Mun na a ye nin lɛtɛrɛw da Jehova ka sarakabɔlan ɲɛfɛ? Nin cɛ ye Ezekiyasi de ye. Israɛl woroduguyanfan kabila fila masakɛ don. Kunkoba de bɛ a da la. Mun na?

Asiri sɔrɔdasiw ye Israɛl kɔgɔduguyanfan kabila 10 halaki kaban. Jehova y’a to o ko ka kɛ bawo o mɔgɔw tun ka jugu kosɛbɛ. Sisan sa, Asirikaw ka sɔrɔdasiw nana walisa ka Israɛl woroduguyanfan kabila fila fana kɛlɛ.

Asiri masakɛ de filɛ ka nin lɛtɛrɛw ci masakɛ Ezekiyasi ma. Ezekiyasi ye o lɛtɛrɛw da Ala ɲɛkɔrɔ yan. Asiri masakɛ  yɛlɛla Jehova ma o lɛtɛrɛw kɔnɔ. Ale y’a fɔ fana Ezekiyasi ye, ko a ka a yɛrɛ di Asirikaw ma. O kosɔn, Ezekiyasi taara Ala deli. A ko: ‘O Jehova, an kisi ka bɔ Asiri masakɛ bolo. O la, jamanaw bɛɛ n’a dɔn ko e kelenpe de ye Ala ye.’ Yala Jehova bɛna Ezekiyasi lamɛn wa?

Ezekiyasi ye masakɛ ɲuman ye. A tun tɛ i ko masakɛjugu minnu tun bɛ Israɛl ka kabila 10 kunna. A tun tɛ fana i ko a fa Akaz min tun ye masakɛjugu ye. Ezekiyasi tun y’a ɲɛmajɔ walisa ka tugu Jehova ka sariyaw bɛɛ kɔ. O de y’a to tuma min na Ezekiyasi tilala delili la dɔrɔn, kira Esayi ye nin ci lase a ma, ka bɔ Jehova yɔrɔ: ‘Asiri masakɛ tɛna don Jerusalɛm kɔnɔ. A ka sɔrɔdasi si tɛna gɛrɛ dugu yɛrɛ la. U tɛna dugu bon hali ni biyɛn kelen ye.’

E ka ja lajɛ min bɛ i kinibolo fɛ. Su minnu bɛɛ dalen bɛ yan yɔrɔ la, yala i b’a dɔn mɔgɔ minnu suw don wa? Asirikaw don. Jehova ye a ka mɛlɛkɛ ci ka Asiri sɔrɔdasi 185 000 faga su kelen na. O la sa, Asiri masakɛ ma kɛlɛ kɛ tun. A kɔseginna ka taa a ka dugu la.

Israɛl ka kabila fila kisira. A mɔgɔw ye hɛrɛ sɔrɔ waati dɔ kɔnɔ. Nka, Ezekiyasi salen kɔfɛ, a denkɛ Manase kɛra masakɛ ye. Manase ani a denkɛ Amɔn min kɛra masakɛ ye a kɔfɛ, olu fila bɛɛ kɛra masakɛjuguw ye. Jamana fara nijuguya ni kojugu la kokura. Masakɛ Amɔn ka baarakɛlaw y’a faga tuma min na, a denkɛ min tɔgɔ ye ko Josiyasi, o kɛra masakɛ ye kabila fila kunna.

2 Masakɛw 18:​1-36; 19:​1-37; 21:​1-25.