ZEICAHDAH hi mipa cu Pathian sin ah thla a cam nan hngal maw? Zeicahdah hi cakuat hna cu Jehovah biakṭheng hmai ah a samh hna? Hi mipa cu Hezekiah a si. Amah cu thlanglei Israel phun hnih hna siangpahrang a si. Cun amah cu harnak nganpi chung ah a phan. Zeicaah?

Zeicah kan ti ahcun Assiria ralkap nih chaklei phun 10 hna ram cu an hrawh cang. Khi mi hna cu an ṭhatlo tuk caah Jehovah nih cubantuk in si awk ah nawl a pek. Cun atu cu Assiria ralkap pawl cu phun-hnih hna pennak kha doh awk ah an hung chuak ve cang.

Assiria siangpahrang nih cu hlan naite ah khan Hezekiah sin ah ca a hun kuat cang. Cu cakuat hna cu hika Pathian hmai i, Hezekiah nih a samh mi cu an si. Cakuat chung ah Jehovah kha a nehsawh i, Hezekiah kha, ka sin ah i pe ko, tiah a rak ti. Cucaah Hezekiah nih: ‘Maw Jehovah, Assiria siangpahrang kut in kan khamh ko sawh. Na kan khamh ahcun miphun vialte nih nangmah lawng cu Pathian na si kha an hngalh lai,’ tiah thla a cam. Hezekiah a thlacamnak cu Jehovah nih a ngai lai maw?

Hezekiah cu siangpahrang ṭha a si. Amah cu Israel phun 10 hna pennak i siangpahrang ṭhalo hna bantuk a si lo i, a ṭha lo mi a pa Siangpahrang Ahaz bantuk zong a si fawn lo. Hezekiah nih thla a cam dih hnu ah, profet Isaiah nih Jehovah sin in a ra mi hi bia cu a cah: ‘Assiria siangpahrang cu Jerusalem ah a ra lai lo. A ralkap pakhat hmanh nih khualipi cu an hun naih lai lo. Khualipi lei ah cantiang pakhat hmanh an kap lai lo.’

Hi cahmai i hmanthlak hi zoh tuah u. Hi a thi mi ralkap hna cu aho an si nan hngal hna maw? Annih cu Assiria mi an si. Jehovah nih a vancungmi pakhat a run thlah i, zan khat chung ah cu vancungmi nihcun Assiria ralkap 185,000 a thah hna. Cucaah Assiria siangpahrang cu a lung a dong i inn ah a kir ṭhan.

Cucaah phun-hnih hna pennak cu a luat i mi hna cu caan tlawmpal chung daihnak an ngei. Sihmanhsehlaw Hezekiah a thih hnu ah, a fapa Manasseh cu siangpahrang a si. Manasseh le a fapa Amon cu an pahnih in a ṭha lo ngaingai mi siangpahrang an si. Cucaah an ram cu sualnak le zangennak in a khat than. Siangpahrang Amon cu a sal hna nih an thah tik ah, a fapa Josiah cu phun-hnih hna pennak ah siangpahrang a si.