NTE ọmọfiọk ntak owo emi ọbọn̄de akam ọnọ Jehovah? Ntak enye onịmde mme leta emi ke iso itie uwa Jehovah? Owo oro edi Hez·e·kiʹah. Enye edi edidem esien Israel iba eke usụk. Ndien odu ke akwa mfịna. Ntak-a?

Koro udịm ekọn̄ mme As·syrʹi·a ẹsesobo esien-10 eke edere. Jehovah ayak emi otịbe koro mmọ emi ẹketịmde ẹdiọk. Ndien ke emi udịm ekọn̄ mbon As·syrʹi·a ẹdi ndin̄wana ye obio ubọn̄ esien iba.

Edidem As·syrʹi·a ọnọ mme leta ẹsọk Edidem Hez·e·kiʹah ndo ndo oro. Mme leta oro ke Hez·e·kiʹah onịm emi ke iso Abasi. Mme leta emi ẹsuene Jehovah, ẹnyụn̄ ẹdọhọ Hez·e·kiʹah ayak obio. Ntre emi anam Hez·e·kiʹah ọbọn̄ akam: ‘O Jehovah, nyan̄a nnyịn ke ubọk edidem As·syrʹi·a. Do kpukpru idụt ẹyefiọk ete afo kpọt edi Abasi.’ Nte Jehovah eyekop ọnọ Hez·e·kiʹah?

Hez·e·kiʹah edi eti edidem. Enye itiehe nte mme idiọk ndidem obio ubọn̄ esien-10 Israel, mme nte idiọk ete esie, Edidem Aʹhaz. Hez·e·kiʹah ekpeme ndinam kpukpru ibet Jehovah. Ntre, ke Hez·e·kiʹah okụrede ndibọn̄ akam, prọfet Isaiah ọdọn̄ etop emi oto Jehovah ọnọ enye: ‘Edidem As·syrʹi·a ididụkke idi Jerusa­lem. Baba mbon ekọn̄ esie idikperekekpere enye. Mmọ iditopke idem idan̄ kiet ke obio oro.’

Sese ndise ke page emi. Nte ọmọfiọk mmọ oro kpukpru okpo mbon ekọn̄ emi ẹdide? Mmọ ẹdi mbon As·syrʹi·a. Jehovah ọkọdọn̄ angel esie, ndien ke okoneyo kiet angel oro ama owot mbon ekọn̄ As·syrʹi·a 185,000. Ntre edidem As·syrʹi·a ọkpọn̄ afiak ọnyọn̄.

Ẹnyan̄a obio ubọn̄ esien iba ndien mme owo ẹnyene emem ke ekpri ini. Edi ke Hez·e·kiʹah akpade, eyen esie Ma·nasʹseh akabade edidem. Ma·nasʹseh ye eyen esie Aʹmon etienede enye edi ata ndiọi ndidem. Ntre isọn̄ afiak ọyọhọ ye ubiat ibet ye obom. Ke mme ifụn esie ẹma ẹkewot Edidem Aʹmon, ẹnam Jo·siʹah eyen esie edidem obio ubọn̄ esien iba.