¿JAMÜSHI naashajaaka chi wayuukai nümaa Jeʼwaa? ¿Jamüsü niʼitaaka tü karalouktakat eeka tü aʼwaajüleekat? Chii, nia Ezequías, aluwataai nia saaʼu tü piamasükat eʼirukuu. ¿Jamüsü sülataka kasa mojusü nümüin?

Shia süka najaʼttirüin na asiriajeʼewaliikana tü poloosükat eʼirukuu. Nuuʼulaain Jeʼwaa tia süka mojulaain naya. Ashuteeshii na asiriajeʼewaliikana saaʼu tü piamasükat eʼirukuu.

Aluwataashi karaloukta chi aluwataaikai Asiria nümüin Ezequías, shia tü niʼitaakat Ezequías eeka tü aʼwaajüleekat. Nemeʼerainpalashi Jeʼwaa otta aapajiraainjachi nikii Ezequías naashin. Nümaka Ezequías: ‹Pükaaliinja waya Jeʼwaa. Sütüjaajeetka saaʼu wayuu süpüshuaʼa piain waneeshin Maleiwain›. ¿Naapüin Jeʼwaa tü nünüikikat?

Nnojoishi mojulaain Ezequías maʼaka naaʼin na aluwataakana saaʼu tü poloosükat eʼirukuu otta maʼaka naaʼin Acaz, chi nüshikai. Oonooshi nia nümüin Jeʼwaa. Sutuma tia, nümaka Jeʼwaa nükajee Isaías: ‹Nnojoleechi antüin Israelmüin chi aluwataaikai Asiria. Nnojoleena arütkaain na nusurulaatsekana otta ojutuin jatü sünainmüin tü piichikat›.

Piirakaa sümüin tü ayaakuaakat. ¿Pütüjaa aaʼu jaralii na surulaat ouktakana? Naya na asiriajeʼewaliikana. Nuluwataain Jeʼwaa wanee aapiee saʼwai, nuʼutaka naaʼin 185.000 surulaat. Sutuma tia, nuʼunaka chi aluwataaikai Asiria.

Isasü tü piamasükat eʼirukuu otta nnojoishii atkaain naya süchikijee tia. Ouktapa Ezequías, aluwataashi Manasés chi nüchonkai. Mojulaashi Manasés otta Ammón chi nüchonkai. Aainjünüsü maʼin kasa mojusü soʼu tia. Nuʼutunapa aaʼin Ammón natuma na nüchepchiakana, nuluwataaka Josías chi nüchonkai.