Kukwe kira 72

Ngöbö Ezequías dimikani

¿ÑOBÄTÄ ni ye tä orare Jehovai gare mäi? ¿Ñobätä tärä ye mikani kwe kä jondron kukwakrä Ngöböi yekänti? Niara ye Ezequías. Nämene reire gobran juta ketebu kädrikri nitre israelkwe yebiti. Aune kukwe kri tä kisete. ¿Ñobätä?

Ñobätä ñan aune nitre rükä Asiria käkwe Gobran juta 10 nitre israelkwe ngwitärikri ye gatebare. Nitre ye nämene ja ngwen käme yebätä Jehová kukwe ye tuanimetre nemen bare. Biti nitre rükä Asiria jatani rüre gobran juta ketebu nitre israelkwe ye rüere.

Rei Asiria tärä juani rei Ezequías ie. Ezequías tärä ne mikani Ngöbö ngwärekri. Tärä yebätä namanintre Jehová kötaire, aune Ezequías ja tuanemetre ganaindre käräbare kwetre ie. Yebätä Ezequías orabare: ‘Jehová, nun mike kwäre rei Asiria kisete. Ye köböire mä Ngöbö itibe rabai gare juta jökrä ie.’ ¿Jehová kukwe nuabare?

Ezequías rei kwin. Niara ñaka töi käme rei gobran juta 10 nitre israelkwe erere, aune rün Acaz töi käme ye erere töi ñaka. Niara kukwe Jehovakwe ye jökrä mikani täte metre. Yebätä, orabare täte kwe ye bitikäre, profeta Isaías ni juani Jehová kukwei niere ie: ‘Rei Asiria ñaka näin Jerusalén. Nitre rükä kwe ye ñaka rökrai mun ken. Niaratre ñaka buko kitai jire juta ye kokwäre.’

Jondron bämikani página nekänti mike ñärärä. ¿Nitre rükä jökrä tä ngwakare ye nire gare mäi? Ye nitre Asiria. Jehová ángel kwe juani, aune köböitibe deu ángel ye käkwe nitre rükä Asiria kämikani 185.000. Yebätä, rei Asiria nikaninta ja gwirete.

Gobran juta ketebu nitre israelkwe ye namani kwäre, aune nitre namaninta nüne jäme. Akwa Ezequías krütani ye bitikäre, niara monsoi Manasés namani reire. Manasés bätä monso kwe Amón ye namani reire töi käme krubäte. Yebätä kukwe käme nuain nämene aune ni kämika nämene kä jökräbiti. Nitre sribikä rei Amón kräke käkwe niara kämikani angwane, monsoi Josías ye mikani reire gobran juta ketebu nitre israelkwe yebiti.

2 Reyes 18:1-36; 19:1-37; 21:1-25.