Mukuru ma vatere ombara Hiskija
EHUNGI 72
Mukuru ma vatere ombara Hiskija
OVE mo tjiwa kutja omena ratjike omurumendu ngwi tji ma kumbu ku Jehova? Omena ratjike eye tja twa otutuu two komurungu wotjipunguhiro tjaJehova? Omurumendu ngwi oHiskija. Eye ombara yomihoko vivari vyaIsrael vyokeyuva kokumoho.Nu eye u ri moumba ounene. Omena ratjike?
Omena rokutja ovarwe vOvaasur vovita va nyona omihoko 10 vyokeyuva kokunene. Jehova wa yandjera kutja ihi tji tjitwe mena rokutja ovandu mbo va ri ovarunde tjinene. Okutja ovarwe wOvaasur ve ya okurwisa ouhona womihoko vivari.
Ombara yaAsur ya za nokuhinda otutuu kombara Hiskija. Otutuu twi Hiskija otwa twa mba komurungu waMukuru. Ombara yaAsur aai toko Jehova motutuu twi, nu aai raere Hiskija kutja nga yumbe ohama. Okutja Hiskija opu ma zu okukumba: ‘Jehova Mukuru wandje, tu yama kombara yaAsur. Okuzambo oviwaṋa avihe mavi tjiwa kutja oove erike ngu ri Mukuru.’ Jehova mape ya a puratene kongumbiro yaHiskija?
Hiskija wa ri ombara ombwa. Eye ka ri tjimuna ozombara ozombi zouhona womihoko 10 vyaIsrael, poo tjimuna ihe Ahas ngwa ri ombara ombi. Hiskija aa ṱakamisa omatwako yaJehova ayehe. Okutja indu Hiskija tja mana okukumba, omuprofete Jesaja we mu hindira ombuze okuza ku Jehova ndji mai tja: ‘Ombara yaAsur kai nakuhita mu Jerusalem. Nandarire kape na ovarwe ve mbu mave ya popezu natjo. Owo kave nakuyumba otjiku nandarire tjimwe kotjihuro tjo.’
Tara kotjiperendero komukuma mbwi. Ove mo tjiwa kutja ovarwe avehe mba koka mba oveṋe? Owo Ovaasur. Jehova wa tuma omuengeli we, nu mouṱuku umwe omuengeli wa zepa ovarwe wOvaasur 185 000. Okutja ombara yaAsur ya tokurihahiza nai yaruka konganda.
Ouhona womihoko vivari wa yamwa, nu otjiwaṋa tja kara nohange okaruveze okasupi. Nungwari kombunda yonḓiro yaHiskija, omuzandu we Manasse wa rira ombara. Manasse nomuzandu we Amon ngwe mu kongorera aveyevari va ri ozombara ozombi tjinene. Okutja ehi re urire nozondjito zotjitandi noutwe rukwao. Indu ombara Amon tja zepewa kovakarere ve omuini, omuzandu we Josija ongwa rira ombara youhona womihoko vivari.
