MA NAKAANAW kʼaʼut yook chi tijok li winq aʼin? Kʼaʼut naq kixkʼe ebʼ li hu chiru li Jehobʼa? Li winq aj Ezequias ut awabʼej re li wiibʼ chi teep re li tenamit Israel. Laj Ezequias wank saʼ chʼaʼajkilal. Ma nakaanaw kʼaʼut?

Xbʼaan naq ebʼ laj puubʼ re Asiria keʼxsach 10 xteepal li tenamit Israel. Li Jehobʼa kixkanabʼ naq teʼxkʼul chixjunil aʼin, xbʼaan naq maaʼusebʼ xnaʼlebʼ. Ebʼ laj puubʼ aʼin, keʼchalk ajwiʼ chi xsachbʼal li wiibʼ chi teep li naxjolomi laj Ezequias.

Li awabʼej re li tenamit Asiria, kixtaqla ebʼ li esil hu choʼq re laj Ezequias. Naq laj Ezequias kixkʼul ebʼ li esil hu kixkʼe chiru li Yos. Chisaʼ ebʼ li hu li awabʼej re Asiria kixmaajewa li Jehobʼa ut kixtaqla xyeebʼal re laj Ezequias naq tixqʼaxtesi ribʼ saʼ ruqʼ. Joʼkan naq, laj Ezequias kitijok chiru li Jehobʼa ut kixye re: ‹At Jehobʼa chooʼaakol chiru li awabʼej re Asiria, ut chi joʼkan chixjunilebʼ li tenamit teʼnawoq re naq kaʼajwiʼ laaʼat li tzʼaqal Yos›. Ma kirabʼi li Jehobʼa li xtij laj Ezequias?

Laj Ezequias chaabʼil awabʼej. Moko maaʼus ta xnaʼlebʼ joʼebʼ li awabʼej re li 10 chi teep re li tenamit Israel. Chi moko kixkʼam ta re rikʼin laj Acaz, li xyuwaʼ. Laj Ezequias kixpaabʼ chixjunil li xchaqʼrabʼ li Jehobʼa. Naq laj Ezequias kiraqeʼk chi tijok, li Jehobʼa kixtaqla laj Isaias chi xyeebʼal re aʼin: ‹Li awabʼej re Asiria inkʼaʼ t-oq saʼ li tenamit aʼin, chi moko tixkut ta junaq ral simaj ut maajun rehebʼ laj puubʼ t-oq saʼ li tenamit›.

Ma nakaanaw anihebʼ li kamenaq li wankebʼ saʼ li eetalil? Aʼanebʼ laj puubʼ re li tenamit Asiria. Li Jehobʼa kixtaqla jun li xʼanjel ut chiru jun qʼoqyink ajwiʼ kixkamsihebʼ 185.000 aj puubʼ. Joʼkan naq li awabʼej re Asiria kisutqʼiik saʼ li tenamit Ninive.

Ebʼ li poyanam li wankebʼ saʼ li wiibʼ chi teep li naxjolomi laj Ezequias, keʼkoleʼk ut keʼwank saʼ tuqtuukilal. Naq kikamk laj Ezequias, laj Manases kikanaak choʼq awabʼej. Laj Manases ralal laj Ezequias. Laj Amon ralal laj Manases. Laj Amon ut laj Manases, maaʼusebʼ xnaʼlebʼ ut keʼwank choʼq awabʼej. Joʼkan naq saʼ li tenamit Israel kinumtaak li kamsink ut li rahilal. Naq laj Amon kikamsiik xbʼaanebʼ laj kʼanjel chiru; laj Josias, li ralal, kikanaak choʼq awabʼej saʼ xbʼeen li wiibʼ chi teep re li tenamit Israel.