YU NO wetin mek dis man ya de pre to Jiova? Wetin mek i put dɛn lɛta ya bifo Jiova in ɔlta? Di man nem Ɛzikaya. Na in na di kiŋ fɔ di kiŋdɔm we gɛt tu trayb. I gɛt sɔntin we de mɔna am. Yu no wetin de mɔna am?

Di Asirian sojaman dɛn dɔn fɛt ɛn win di kiŋdɔm we gɛt tɛn trayb. Jiova mek dis bi bikɔs di pipul dɛn bin tu bad. Ɛn naw di Asirian sojaman dɛn dɔn kam fɔ fɛt di kiŋdɔm we gɛt tu trayb.

Di kiŋ na Asiria jɔs dɔn sɛn lɛta dɛn to Kiŋ Ɛzikaya. Na dɛn lɛta ya Ɛzikaya put bifo Gɔd in ɔlta so. Di kiŋ rayt to Ɛzikaya se, na fɔ natin dɛn de abop pan Jiova. Ɛn i se Jiova nɔ go ɛp dɛn. So na dis mek Ɛzikaya pre se: ‘Duya Jiova, sev wi na dis kiŋ in an. Dɔn ɔl di ɔda kɔntri dɛn go no se na yu nɔmɔ na Gɔd.’ Yu tink se Jiova go lisin to Ɛzikaya in prea?

Ɛzikaya na gud kiŋ. I nɔ tan lɛk di bad kiŋ dɛn we bin de na di kiŋdɔm we gɛt tɛn trayb. Ɛn i nɔ tan lɛk in bad papa we na Kiŋ Eaz. Ɛzikaya bin de du ɔl wetin Jiova in lɔ se. So we Ɛzikaya pre dɔn, Jiova sɛn Ayzaya fɔ go tɛl am se: ‘Di kiŋ we de na Asiria nɔ go kam na Jerusɛlɛm. Wan pan in sojaman dɛnsɛf nɔ go kam nia Jerusɛlɛm. Dɛn nɔ go shut natin insay di tɔŋ.’

Luk di pikchɔ na dis pej. Yu no udat na dɛn sojaman ya we dɔn day? Na di Asirian sojaman dɛn. Jiova sɛn wan enjɛl, ɛn di enjɛl kil 185,000 Asirian sojaman dɛn. Na wan gren nɛt di enjɛl kil ɔl dɛn sojaman ya. Dis mek di kiŋ na Asiria in at pwɛl, ɛn i go bak na in kɔntri.

Jiova sev di kiŋdɔm we gɛt tu trayb, ɛn di pipul dɛn gɛt pis fɔ sɔm tɛm. Afta Ɛzikaya day, na in pikin we nem Manasɛ bi kiŋ. Manasɛ na bin bad kiŋ. Ɛn in pikin sɛf we nem Amɔn we rul afta am, bin bad. So di pipul dɛn bigin fɔ du bad tin dɛn bak. Afta sɔm tɛm, Kiŋ Amɔn in savant dɛn kil am. We i day, na in pikin we nem Josaya bi kiŋ fɔ di kiŋdɔm we gɛt tu trayb.