ONO diva asi morwasinke ana kukanderera mugara ogu kwaJehova? Morwasinke ana zarere nombilive edi komeho zosizambero saJehova? Mugara ogu kuna kara Hisikiya. Age yige hompa gomazimo gaIsraeli gavali gokoMbindakano. Age kuna kara moudigu wounene. Morwasinke?

Morwa vakwayita woVaasiliya nare va zonagwire po mazimo 10 gokoMuzogo-zogo. Jehova kwa yi pulisira eyi yi horoke, morwa vantu vena kwa kere wovadona sili. Ngesi vakwayita vaAsiliya vana wiza hena va ya rwise uhompa womazimo gavali.

Hompa gwaAsiliya ana tumine hompa Hisikiya nombilive. Edi yido nombilive ana tura Hisikiya apa komeho zaKarunga. Nombilive kuna kuswaura Jehova, nokutantera Hisikiya asi a ligave. Eyi yiyo nye ana kukanderera Hisikiya asi: ‘Jehova, tu yoworora kwahompa gwaAsiliya. Makura nomuhoko nadinye ngadi divire po asi ove nyovelike Karunga.’ Jehova na purakena Hisikiya ndi?

Hisikiya hompa gomuwa. Age kapisi ngwendi vahompa wovadona wouhompa waIsraeli womazimo 10, ntani age kapisi ngwendi oguhwe wovadona hompa Ahasi. Hisikiya kudivilisa nawa asi a limburukwe noveta daJehova nadinye. Apa ga mene Hisikiya kukanderera, muporofete Jesaya ta mu tumine mbudi ezi zokutunda kwaJehova asi: ‘Hompa gwaAsiliya kapi nga hwilira moJerusarema. Kwato nampili mukwayita gwendi gumwe ogu nga wiza nampili popepi. Kapi ngava ponya sitata esi nampili sikutji simwe seesi.’

Tara kefano pepenuno eli. Ono diva asi wolye vakwayita navenye ava wokufa? Awo Vaasiliya. Jehova kwa tumine muengeli gwendi, makura mesiku limwe muengeli ta dipaga vakwayita woVaasiliya 185 000. Hompa gwaAsiliya makura ta hageke nokutengura ko kembo.

Uhompa womazimo gavali kwa u yowerere, ano vantu tava kara nombili siruwo sosisupi. Nye apa ana fu Hisikiya, munwendi gomugara Manase ta zi mouhompa. Manase namunwendi Amoni ogu ga mu kweme navenye kwa kere vahompa wovadona. Sirongo makura tasi zura hena ukorokotji nonyanya. Hompa Amoni apa va mu dipagere vakareli vamwene, munwendi Josiya tava mu tura hompa gouhompa womazimo gavali.

2 Vahompa 18:1-36; 19:1-37; 21:1-25.