Icisimicisyo 72: BaLesa Baofwa Imfumu Esikaya
KANI waisibo’mulandu uyu umwalalume alukutembelela kuli baYehoba? Mba nindo afungulwila isi mbaluba pantangile ya conto ca baYehoba? Umwalalume ni Esikaya. Ni mfumu ya pa fikoto fyobilo ifya mu Isilaeli. Kabili ali mu makatasyo aengi. Mba nindo?
Nipakuti ifita fya baAsiliya fyaonala kale ubufumu bwa fikoto 10. BaYehoba balilekele’ci ukucitika nipakuti abo abantu baali ni mbifi. Kabili ifita fya baAsiliya fyaisa mukulwa ne bufumu bwa fikoto fyobilo.
Imfumu ya ku Asiliya eli yatuma lukoso imbaluba ku Mfumu Esikaya. Isi e mbaluba Esikaya abika apa pantangile ya baLesa. Imbaluba silukutongala baYehoba, kabili syabula Esikaya ukuleka ifi alukucita. Kansi uyu e mulandu Esikaya atembelela ati: ‘Mwe baYehoba, nga mutupulusye ku mfumu ya ku Asiliya. Eli yonse imikoka ikesiba ati mwebo mwenka emwe baLesa.’ Kani baYehoba bakukutika kuli Esikaya?
Esikaya ni mfumu iweme. Talipo koti ni mfumu imbifi isya pa bufumu bwa fikoto 10 ifya mu Isilaeli, neli koti niwisi imbifi Imfumu Eyasi. Esikaya alibikileko akalango ku kumfwila onse amafunde abaYehoba. Popele, panuma ili Esikaya asila ukutembela, Yisaya uwakusimika amutumina ici cebo ukufuma kuli baYehoba: ‘Imfumu ya ku Asiliya taikesamo mu Jelusalemi. Neli umo pa fita fyaiko takapalaminako. Tabakafikisamo neli umo umufwi mu musi.’
Lolesya pa cikope icili apa pe bula. Kani wafisiba fyonse’fi ifita ififwile? Fita fya baAsiliya. BaYehoba balitumine inkalamba yabo, kabili mu busiku bumo inkalamba yalipeye ifita 185,000 ifya baAsiliya. Popele imfumu ya ku Asiliya yaleka ifi ilukucita kabili yabwelela nakwabo.
Ubufumu bwa fikoto fyobilo bwapuluka, kabili abantu bakwato’butende pa mpindi inini. Pano panuma ili Esikaya afwa, Manase umwana wakwe abe’mfumu. Manase na Amoni umwana wakwe, abatekele panuma yakwe bonse ni mfumu imbifi. Popele nakabili icalo caisulamo bumapusi ne bungwa. Ili Imfumu Amoni bayipaya ku bapyungisi baiko, Josaya umwana waiko ewaba imfumu ya pa bufumu bwa fikoto fyobilo.
2 Imfumu 18:1-36; 19:1-37; 21:1-25.
Ifyakwipusya
- Mba ninani umwalalume uuli mu cikope, kabili nindo abelele mu makatasyo aengi?
- Mba nimbaluba sya ndo isi Esikaya abika pantangile ya baLesa, kabili findo Esikaya atembela?
- Esikaya ni mfumu ya musango syani, kabili nicisa cebo baYehoba bamutumina ukupitila muli Yisaya uwakusimika?
- Kani inkalamba ya baYehoba yacite’ndo ku baAsiliya, koti nifyefyo ulukubona mu cikope?
- Nangaba’ti ubufumu bwa fikoto fyobilo bwakwato’butende pa kapindi akanini, findo fyacitika panuma ili Esikaya afwa?
Ifyakwipusya na fimbi
- Pendeni 2 Imfumu 18:1-36.
Kani Labisyake uwakulabililako abaAsiliya alyesesye syani ukunasya icicetekelo ca baIsilaeli? (2 Imf. 18:19, 21; Fum. 5:2; Amasa. 64:3)
Kani kuli abalukucicila, Bamboni sya baYehoba bangalonda syani icakubwenako cakwe Esikaya? (2 Imf. 18:36; Amasa. 39:1; Ifisi.26:4; 2 Tim. 2:24)
- Pendeni 2 Imfumu 19:1-37.
Kani abantu ba baYehoba muli bulelo balalonda syani icakubwenako cakwe Esikaya mu mpindi sya makatasyo? (2 Imf. 19:1, 2; Ifisi.3:5, 6; Ebeya. 10:24, 25; Jako. 5:14, 15)
Mba nifisa fintu fitatu ifyacitikile ku Mfumu Senakelibi, kabili ninani emakaninako? (2 Imf. 19: 32, 35, 37; Fisu. 20:2, 3)
- Pendeni 2 Imfumu 21:1-6, 16.
Mba nindo tungalabilila ati Manase aali ni mfumu iyacililepo bumbifi na pa mfumu isyatekele mu Jelusalemi? (2 Ifye. 33:4-6, 9)
