ENGVANGINNGE he mipa hi Jehova hnena a tawngtai i hria em? Engvanginnge heng lehkhathawnte hi Jehova maicham hmaa a dah? Mipa hi Hezekia a ni. Israel chhimlam hnam hniha lal a ni. Tin buaina a ngah hle mai a. Engvanginnge?

Assuria sipai rualten hmarlam hnam 10 an tihchhiat tawh vang a ni. Chung mipuite chu an that loh em vangin Jehovan chu chu a thlentir a ni. Tin tunah Assuria sipai rualte chu hnam hnih ram do turin an lo kal a.

Assuria lal chuan Lal Hezekia hnenah lehkha a thawn hlim a ni a. Chung lehkhathawnte chu heta Pathian hmaa Hezekian a dahte hi chu chu an ni. Lehkhathawnte chuan Jehova an nuihsan a, inpe turin Hezekia an hriih a. Chuvang chuan Hezekia a tawngtai a: ‘Aw Jehova, Assuria lal lak ata min chhanhim ang che. Tichuan hnam zawng zawngin nangmah chauh hi Pathian i ni tih an hria ang,’ tiin. Jehovan Hezekia a ngaithla em?

Hezekia chu lal tha a ni a. Israel hnam 10 rama lal tha lote ang emaw, a pa mi tha lo LaI Ahaza ang emaw a ni lo. Hezekia chu Jehova dan zawng zawng zawm turin a fimkhur a. Chuvangin Hezekia tawngtai zawh hnuah, zawlnei Isaian Jehova hnena mi he thuchah hi a thawn a: ‘Assuria lal chu Jerusalem-ah a lo lut lo vang a. A sipaite tumah a hnaiah pawh an lo kal lo vang. Khawpuiah thal pakhat mah an kap lut lo vang,’ tih hi.

He mi pheka milem hi en teh. Heng sipai thi zawng zawng hi tute nge an nih i hria em? Assuria-mite an ni. Jehovan a vantirhkoh a tir a, tin zan khatah vantirhkohvin Assuria sipaite 185,000 a tihlum a. Chutichuan Assuria lal chuan a bansan a, a haw ta a.

Hnam hnihte ram chhanhim a ni ta, tichuan mipuite chuan muanna an nei ta rih a. Mahse Hezekia thih hnuah a fapa Manassea chu lal a lo ni a. Manassea leh a hnua a fapa Amona chu lal tha lo deuh an ni ve ve a. Tichuan ram chu pawikhawihna leh pawngneknain a khat leh a. Lalber Amona chu ama chhiahhlawhten an tihhlum hnuah, a fapa Josia chu hnam hnih ram Iala siam a ni.