¿NEL tnikʼe tiquʼn nnaʼnju xjal Dios? ¿Tiquʼn ma chi kubʼ tlikʼbʼaʼn qe uʼj lu twitz patbʼil oyaj? Atzun Ezequías jlu. Aju nkawin kyibʼaj kabʼe kʼloj kyiyjil aj Israel. Ma tzʼok weʼ twitz mya bʼaʼn. ¿Tiquʼn?

Tuʼnju ma chi kubʼ kynajsaʼn aj Asiria qeju 10 kʼloj kyyajil aj Israel. Xi tqʼoʼn Jehová ambʼil tuʼn tbʼaj jlu, tuʼnjo mya bʼaʼn nkubʼtoq kybʼinchen xjal. Atzen jaʼle ma chi ul qeju soldad te Asiria tuʼn kyqʼojin kyiʼj qeju kabʼe kʼloj kyiyjil aj Israel.

Tzmatoq nul tsamaʼn ajkawil te Asiria qe uʼj te Ezequías aju ajkawel. Aqetzun uʼj jlu ma chi kubʼ tlikʼen Ezequías twitz Jehová. Mya bʼaʼn nkyqʼamaʼn uʼj lu tiʼj Jehová, ex nxi kymaʼn tuʼn miʼ tqʼojen Ezequías. Tuʼntzen jlu ok ten Ezequías naʼl Dios kyjalu: ‹Aya qDiose Jehová, qo tkloma kyiʼj aj Asiria. Tuʼntzun tel kynikʼ kykyaqil qe nasyon qa oʼkxku aya jun Dios›. ¿Tzajpetzulo tbʼiʼn Jehová tnaʼj Dios Ezequías?

Tbʼaneltaq ajkawil te Ezequías. Nya ikteq tzeʼn qejo mya bʼaʼn ajkawel kye qeju 10 kʼloj kyiyjil aj Israel, ex nya ik tzaʼntoq ttat aju mya bʼaʼn ajkawil Acaz. Ex kukx nchi okx tbʼiʼnteq tkyaqil tkawbʼil Jehová. Tuʼntzunju, tej tbʼaj naʼn Dios, tzaj tsamaʼn Isaías aju tqanil tzaj tqʼmaʼn Jehová te: ‹Mlay tzʼokx ajkawel te Asiria tuj Jerusalén. Nixqe tsoldad mlay chi pon laqʼeʼ ex mlay txi kyxoʼn jun plech tiʼj Jerusalén›.

Kinkuxe tilbʼilal tkuʼx tzalu. ¿Ojtzqiʼn tuʼna alkyeqe soldad ma che bʼaj kyim? te Asiriaqeʼ. Tzaj tsamaʼn Jehová jun t-anjel, ex tojx jun qonikʼen e kubʼ tbʼiyoʼn jun syent tukʼ 85 mil soldad te Asiria. Tuʼntzunju, anj meltzʼaj ajkawil te Asiria.

E klet qe kabʼe kʼloj kyyajil aj Israel, ex i tentzen toj mujbʼabʼil toj chʼin ambʼil. Tejtzun tkyim Ezequías, atl Manasés aju tkʼwal ok te ajkawil. Mya bʼaʼn ajkawil oka Manasés, ax ikx Amón aju tkʼwal. Kyjuʼtzun, kubʼ noj twitz txʼotxʼ tuʼn mya bʼaʼn. Tej tkubʼ bʼiyoʼn Amón kyuʼn tmajen, atl Josías ajo tkʼwaʼl ok te ajkawil kyibʼaj qeju kabʼe kʼloj kyiyjil aj Israel.