Gâd Mita King Hesekaia Ra Help Munan
Sturka 72
Gâd Mita King Hesekaia Ra Help Munan
WAITNIKA na dia muni Jehova ra ai pura suni ba nu sma ki? Dia muni witin wauhkataya nani ba Jehova altarka mawanra mangkan sa? Witin ba Hesekaia kan. Bara witin ba Israel kyamka nani wal waupasa wina kan ba kingka kan. Witin ba pât tara ra kan. Dia muni?
Kan Asiria aiklabaia daknika mita, Israel kyamka 10 yahbra wina kan ra, pat sauhki tikan kan. Witin nani ba uba saura kan ba mita, Jehova bui swin baku takan. Bara nanara Asiria aiklabaia daknika ba, Israel kyamka wal kan ba mapara aiklabaia balan.
Asiria kingka mita king Hesekaia ra wauhtaya nani ulbi blikan. Baha wauhkataya nani sika, king Hesekaia bri bal Gâd mawanra mangkan ba. Wauhtaya nani ba ra, Jehova lawaska kiki, Hesekaia ra ai mapara aiklabia apia dukyara ulban kan. Baha mita Hesekaia, ai pura suni win: ‘Alai Jehova, Asiria kingka mihta wina swaki wan saks. Baku lika nisan nani sut nu takbia man baman Gâd sma ba.’ Sakuna Jehova, pura sunra ba walan ki?
Hesekaia ba king pain kum kan. Witin king saura wala nani Israel kyamka 10 ra, bara ai aisa king Ehas kan ba baku apia kan. Jehova lâka nani sut ba aman kaiki bila wali dauki kan. Baha mita, witin ai pura sunan ningkara, Jehova mita ai prapitka Aiseya bak naha bila aisanka na blikan: ‘Asiria kingka ba Jerusalem ra dimbia apia. Aiklaklabrika kumi sin lamara wabia apia. Taun mapara, trisbaya kumi sin lulkbia apia.’
Naha wahya lilkika ba kais. Upla pruan ba ya nani kan sapa nu sma ki? Asiria aiklaklabrika nani kan. Jehova mita ai insalka blikan, bara tihmia kumira Asiria aiklaklabrika nani 185.000 ra ikan. Baha mita Asiria kingka ba mahka wan.
King laka Israel kyamka wal ba swaki takan, bara taun uplika nani ba pyu kunhku laman laka ra iwan. Sakuna Hesekaia pruan ningkara, ai luhpia waitna Manasis ba king aimakan. Manasis bara ai luhpia waitna Amun, king saura bangwi kan. Baha mita taun ba lâ krikan bara rau munan laka ni bangki kan. Albika nani mita king Amun ra ikan taim, ai luhpia Jusaia ba Israel kyamka wal ba purara king aimakan.
2 King nani 18:1-36; 19:1-37; 21:1-25.
